គៀវ៖ អ៊ុយក្រែនបានអះអាងថា ប្រព័ន្ធការពារដែនអាកាសរបស់ខ្លួនបានបំផ្លាញមីស៊ីលចំនួន ១៥ ក្នុងចំណោម ១៨ គ្រាប់ដែលត្រូវបានបាញ់ដោយកងកម្លាំងរុស្ស៊ី ខណៈដែលទីក្រុងម៉ូស្គូ បានបង្កើនការវាយប្រហារលើប្រទេសជិតខាង របស់ខ្លួនក្នុងរយៈពេលប៉ុន្មានថ្ងៃថ្មីៗនេះ។
អគ្គមេបញ្ជាការនៃកងកម្លាំងប្រដាប់អាវុធលោក Valeriy Zaluzhnyi បាននិយាយនៅលើប៉ុស្តិ៍ Telegram របស់លោកថា “នៅម៉ោងប្រហែល២ និង ៣០នាទីព្រឹកថ្ងៃច័ន្ទនេះ រុស្ស៊ី បានឈ្លានពានដោយវាយប្រហារអ៊ុយក្រែន ពីយន្តហោះអាកាសចរណ៍យុទ្ធសាស្ត្រ” ។
មន្ត្រីនៅទីក្រុងគៀវ បានឲ្យដឹងថា គ្មានការស្លាប់ និងរបួសរបស់ជនស៊ីវិល ឬការបំផ្លិចបំផ្លាញអគារលំនៅដ្ឋាន ឬហេដ្ឋារចនាសម្ព័ន្ធត្រូវបានកត់ត្រាភ្លាមៗនោះទេ នេះបើយោងតាមការចុះផ្សាយ របស់ទីភ្នាក់ងារសារព័ត៌មាន Aljazeera។
កាំជ្រួចទាំងអស់ដែលតម្រង់មកកាន់រដ្ឋធានីអ៊ុយក្រែន ត្រូវបានបំផ្លាញនៅក្នុងអ្វីដែលគេនិយាយថា ជាការវាយប្រហារលើកទីពីរលើក្រុងគៀវក្នុងរយៈពេល 3ថ្ងៃ។ ក្រុមមន្ត្រីបានឲ្យដឹងថា ប្រព័ន្ធការពារអាកាសក៏ត្រូវបានអំពាវនាវ ឱ្យធ្វើសកម្មភាពដើម្បីការពារតំបន់គៀវ ដែលជាអង្គភាពរដ្ឋបាលដាច់ដោយឡែកពីរដ្ឋធានី។
លោក Oleksandr Prokudin នៃរដ្ឋបាលយោធាសម្រាប់តំបន់ Kherson បានឲ្យដឹងថា “ក្នុងរយៈពេលមួយថ្ងៃកន្លងមក ខ្មាំងបានបាញ់ផ្លោងចំនួន ៣៩គ្រាប់ ដោយបានបាញ់ផ្លោងចំនួន ១៦៣ គ្រាប់ពីកាំភ្លើងធំធុនធ្ងន់ Grads និងគ្រាប់រ៉ុក្កែតច្រើនប្រភេទ និងយន្តហោះដ្រូន UAVs “។
ប្រទេសរុស្ស៊ីនៅតែគ្រប់គ្រងផ្នែកមួយនៃតំបន់ Kherson ប៉ុន្តែបានដកខ្លួនចេញពីរដ្ឋធានីក្នុងតំបន់ ដែលមានឈ្មោះដូចគ្នានៅក្នុងខែវិច្ឆិកា។ មន្ត្រីនៃក្រុមប្រឹក្សាតំបន់បានបញ្ជាក់ថា មីស៊ីលរបស់រុស្ស៊ី ក៏បានបាញ់ចំកណ្តាលក្រុង Dnipro ដែរ។ ក្រុមមន្ត្រីការពារដែនអាកាស បានបាញ់ទម្លាក់កាំជ្រួចចំនួន ៧ ប៉ុន្តែមនុស្ស ២៥នាក់បានស្វែងរកជំនួយផ្នែកវេជ្ជសាស្ត្រ៕ ប្រែសម្រួល ឈូក បូរ៉ា
