តូក្យូ ៖ រដ្ឋាភិបាលជប៉ុនបានឲ្យដឹងថា ប្រទេសជប៉ុន នឹងដាក់ប្រទេសកូរ៉េខាងត្បូង ជាដៃគូពាណិជ្ជកម្ម ដែលពេញចិត្តនៅថ្ងៃទី២១ ខែកក្កដា បន្ទាប់ពីការផ្លាស់ប្តូរស្រដៀងគ្នា ដោយទីក្រុងសេអ៊ូល លើស្ថានភាពពាណិជ្ជកម្មរបស់ទីក្រុងតូក្យូ។
សកម្មភាពនេះបង្ហាញ ពីការធ្វើឱ្យមានលក្ខណៈធម្មតានៃពាណិជ្ជកម្ម រវាងប្រទេសទាំងពីរ បន្ទាប់ពីទំនាក់ទំនង របស់ពួកគេកាន់តែអាក្រក់ ទៅចំណុចទាបបំផុតរបស់ពួកគេ ក្នុងរយៈពេលជាច្រើនទសវត្សរ៍ក្នុងប្រវត្តិសាស្ត្រ សម័យសង្គ្រាម។ មន្ត្រីបានឲ្យដឹងថា ពួកគេក៏ជិតដល់កិច្ចព្រមព្រៀងមួយ ដើម្បីបន្តកិច្ចព្រមព្រៀងប្តូររូបិយប័ណ្ណទ្វេភាគីផងដែរ ។
ការដកកូរ៉េខាងត្បូងឆ្នាំ២០១៩ ចេញពី “បញ្ជីស” នៃបណ្តាប្រទេស ដែលមានសិទ្ធិទទួលបានការរឹតបន្តឹង អប្បបរមាលើពាណិជ្ជកម្ម បានកើតឡើងបន្ទាប់ពីតុលាការកំពូល របស់កូរ៉េខាងត្បូង កាលពីឆ្នាំមុនបានបញ្ជាឱ្យក្រុមហ៊ុនជប៉ុនចំនួន ពីរផ្តល់សំណងដល់ដើមបណ្តឹងកូរ៉េ លើការចោទប្រកាន់លើការងារដោយបង្ខំ ដែលទាក់ទងនឹងអាណានិគមរបស់ប្រទេសជប៉ុន ឆ្នាំ១៩១០-១៩៤៥ នៃការគ្រប់គ្រងឧបទ្វីបកូរ៉េ។
ទោះបីជាត្រូវបានមើលឃើញ យ៉ាងទូលំទូលាយថា ជាជំហានសងសឹកក៏ដោយ ប្រទេសជប៉ុននៅពេលនោះបានឲ្យដឹងថា ខ្លួនមានការព្រួយបារម្ភ លើប្រព័ន្ធនាំចេញរបស់ទីក្រុងសេអ៊ូល ហើយចាំបាច់ត្រូវបញ្ជាក់ថា តើវាមានប្រសិទ្ធភាពក្នុងការទប់ស្កាត់ទំនិញនាំចេញមិនឱ្យហូរចូលកូរ៉េខាងជើង និងប្រទេសដែលមានការ ព្រួយបារម្ភផ្សេងទៀតដែរឬទេ ។ វិធានការនេះបានប៉ះពាល់ដល់ផលិតផល និងបច្ចេកវិទ្យាជាច្រើន ដែលអាចត្រូវបានបង្វែរទិសដៅ សម្រាប់ការប្រើប្រាស់យោធា។
កាលពីថ្ងៃអង្គារ គណៈរដ្ឋមន្ត្រីបានផ្តល់ការអនុម័ត បន្ទាប់ពីការបញ្ចប់នីតិវិធី ដើម្បីប្រមូលមតិសាធារណៈលើការលើកលែង វិធានការនេះបើតាមក្រសួងសេដ្ឋកិច្ច ពាណិជ្ជកម្ម និងឧស្សាហកម្ម។ រដ្ឋមន្ត្រីសេដ្ឋកិច្ច ពាណិជ្ជកម្ម និងឧស្សាហកម្ម លោក Yasutoshi Nishimura បានប្រាប់សន្និសីទសារព័ត៌មានថា ប្រទេសទាំងពីរក៏បានព្រមព្រៀង គ្នាផងដែរ ក្នុងការបង្កើតគ្រោងការណ៍តាមដាន រួមទាំងការពិនិត្យឡើងវិញ នូវប្រព័ន្ធត្រួតពិនិត្យការនាំចេញ របស់ប្រទេសទាំងពីរ ប្រសិនបើចាំបាច់៕
ប្រែសម្រួល ឈូក បូរ៉ា
