បរទេស៖ អភិបាលរដ្ឋ New Mexico លោកស្រី Michelle Lujan Grisham កាលពីថ្ងៃសៅរ៍ម្សិលមិញ បានចេញសេចក្តីប្រកាសមួយក្នុងការអនុវត្ត ការផ្អាកយកអាវុធដោយបើកចំហតាមខ្លួនក្នុងទីក្រុងដ៏ធំបំផុតរបស់រដ្ឋ Albuquerque រយៈពេល៣០ថ្ងៃ។
ទីភ្នាក់ងារចិនស៊ិនហួបានសរសេរថាបញ្ជាហាមការយកកាំភ្លើងតាមខ្លួននឹងត្រូវធ្វើឡើងជាបណ្ដោះអាសន្នក្នុងអំឡុងពេលនេះដោយសារតែមួយរយៈចុងក្រោយនេះសកម្មភាពបង្កហិង្សាដោយអាវុធបានផ្ទុះឡើងខ្លាំងនៅតាមតំបន់នានាក្នុងទីក្រុង។
លោកស្រីអភិបាលបាននិយាយនៅក្នុងសន្និសីទសារព័ត៌មានមួយ ដោយបន្ថែមថាគាត់បានត្រៀមខ្លួនសម្រាប់ការប្រយុទ្ធតាមផ្លូវច្បាប់ថា៖អំពើហឹង្សាដោយកាំភ្លើងនឹងបង្កឱ្យមានបញ្ហាប្រឈមមិនគួរឱ្យជឿសម្រាប់ខ្ញុំក្នុងឋានៈជាអភិបាលរដ្ឋ។
សេចក្តីថ្លែងការណ៍នោះបានបញ្ជាក់ដែរថា បន្ទាប់ពីរយៈពេល៣០ថ្ងៃ រដ្ឋាភិបាលរដ្ឋនឹងវាយតម្លៃថាតើពួកគេគួរតែបន្តបទបញ្ជានេះ ឬធ្វើការកែតម្រូវ។
គួរឲ្យដឹងដែរថាថ្មីៗនេះ Albuquerque បានឃើញអំពើហិង្សាដោយកាំភ្លើងជាច្រើនលើកជាក់ស្តែងកាលពីថ្ងៃពុធ ក្មេងប្រុសអាយុ១១ឆ្នាំម្នាក់ត្រូវបានគេបាញ់សម្លាប់នៅខាងក្រៅកីឡដ្ឋានកីឡាជាដើម៕ ប្រែសម្រួល៖ស៊ុនលី
