បរទេស៖ យោងតាមការចេញផ្សាយរបស់ RT កាលពីថ្ងៃម្សិលមិញមនុស្សរាប់ពាន់នាក់បានធ្វើបាតុកម្មនៅតាមដងផ្លូវ នៃទីក្រុងប៊ែរឡាំង ដោយទាមទារឲ្យបញ្ចប់អំពើប្រល័យពូជសាសន៍របស់អ៊ីស្រាអែលនៅតំបន់ហ្គាហ្សាប៉ុន្តែ អាជ្ញាធរមូលដ្ឋានបានដាក់កំហិតយ៉ាងខ្លាំងចំពោះការតវ៉ាដែលមានការគាំទ្រដល់ជនប៉ាឡេស្ទីន។
ទីភ្នាក់ងារសារព័ត៌មាន DPA បានរាយការណ៍ថា មនុស្សប្រហែល៦០០០នាក់បានដើរដង្ហែរក្នុងរដ្ឋធានីអាល្លឺម៉ង់ បើទោះបីជាក្រុមឆ្វេងនិយមមួយចំនួនដែលពាក់ព័ន្ធនឹងការរៀបចំការប្រមូលផ្តុំនេះបានអះអាងថាចំនួននេះច្រើនជាងប្រាំដងបានចូលរួមក៏ដោយ។
វីដេអូដែលថតដោយក្រុមការងារ RT បានបង្ហាញថាហ្វូងមនុស្សកាន់ទង់ជាតិប៉ាឡេស្ទីន និងបដាដែលអានថា “បញ្ឈប់ការប្រល័យពូជសាសន៍” “តើមានក្មេងប៉ុន្មាននាក់ដែលត្រូវស្លាប់?” និង “បង្កើតបទឈប់បាញ់ឥឡូវនេះ”ជាដើម ។
គួរឲ្យដឹងដែរថាទីក្រុងប៊ែរឡាំង និងទីក្រុងផ្សេងទៀតរបស់អាល្លឺម៉ង់បានឆ្លើយតបទៅនឹងការផ្ទុះឡើងនៃសង្រ្គាមអ៊ីស្រាអែល-ហាម៉ាស ដោយហាមឃាត់រាល់បាតុកម្មដែលគាំទ្រប៉ាឡេស្ទីន។ ការតវ៉ាខុសច្បាប់ជាច្រើនបានធ្វើឡើងនៅទីក្រុងប៊ែរឡាំង ដោយមានមន្ត្រីប៉ូលិស៦៥នាក់បានរងរបួស និងបាតុករ១៧៤នាក់ត្រូវបានចាប់ខ្លួននៅឯការ ប្រមូលផ្តុំដែលបានក្លាយជាអំពើហិង្សានៅក្នុងទីក្រុងកាលពីចុងខែតុលា៕ ប្រែសម្រួល៖ស៊ុនលី
