អាមេរិក៖ យោងតាមការចេញផ្សាយពីគេហទំព័រ RTបានប្រាប់ឲ្យដឹងថា លោកស្រី Rosalynn Carter ភរិយារបស់ប្រធានាធិបតីអាមេរិកទី ៣៩ លោក Jimmy Carter បានទទួលមរណភាពនៅផ្ទះគ្រួសាររបស់លោកស្រី នៅ Plains រដ្ឋ Georgia កាលពីថ្ងៃអាទិត្យក្នុងអាយុ ៩៦ ឆ្នាំ។
លោក Jimmy Carter ដែលមានអាយុ ៩៩ ឆ្នាំបាននិយាយក្នុងសេចក្តីថ្លែងការណ៍មួយថា លោកស្រីRosalynn គឺជាដៃគូមួយទល់នឹងមួយរបស់ខ្ញុំ នៅក្នុងអ្វីគ្រប់យ៉ាងដែលខ្ញុំធ្លាប់ធ្វើ។ លោកស្រីបានផ្ដល់ការណែនាំ និងការលើកទឹកចិត្តដ៏ឈ្លាសវៃដល់ខ្ញុំ នៅពេលខ្ញុំត្រូវការលោកស្រី។ ដរាបណាលោកស្រី Rosalynn ស្ថិតនៅក្នុងពិភពលោក ខ្ញុំតែងតែដឹងថានរណាម្នាក់ស្រឡាញ់ និងគាំទ្រខ្ញុំ។
មជ្ឈមណ្ឌល Carter បានលាតត្រដាងកាលពីថ្ងៃសុក្រថា អតីតស្ត្រីទីមួយត្រូវបានគេរកឃើញថា មានជំងឺវង្វេងកាលខែឧសភា។ លោកស្រីបានចូលមន្ទីរពេទ្យព្យាបាល ចំណែកប្តីរបស់លោកស្រីបានទទួលការថែទាំនៅផ្ទះតាំងពីខែកុម្ភៈ។
លោកស្រី Eleanor Rosalynn Carter កើតនៅថ្ងៃទី ១៨ ខែសីហាឆ្នាំ ១៩២៧ នៅ Plains រដ្ឋ Georgia ។ លោកស្រីបានរៀបការជាមួយលោក Jimmy Carter ក្នុងឆ្នាំ ១៩៤៦ នៅពេលលោកស្រីមានអាយុ ១៨ ឆ្នាំ ហើយប្តីរបស់លោកស្រីមានអាយុ ២១ ឆ្នាំ។ ប្តីរបស់លោកស្រីបានបន្តធ្វើជាអភិបាលរដ្ឋ Georgia និងបានបម្រើការជាប្រធានាធិបតីពីឆ្នាំ ១៩៧៧ ដល់ឆ្នាំ ១៩៨១ ។
ស្ត្រីទីមួយត្រូវបានគេស្គាល់ថា ជាអ្នកមនុស្សធម៌ និងជាអ្នកតស៊ូមតិផ្នែកសុខភាពផ្លូវចិត្ត។ លោកស្រីត្រូវបានគេស្គាល់ថា ជា ‘Steel Magnolia’ ដោយសារព័ត៌មានដែលបានសរសើរលោកស្រីថា ជាកម្លាំងនៅពីក្រោយអាជីពនយោបាយរបស់ស្វាមីនាង។
នៅក្នុងបទសម្ភាសន៍មួយកាលពីឆ្នាំ ២០១៥ លោក Carter បានហៅប្រពន្ធរបស់លោកថា ជាចំណុចកំពូលនៃជីវិតរបស់លោក ដោយនិយាយថា អ្វីដែលល្អបំផុតដែលខ្ញុំធ្លាប់ធ្វើគឺរៀបការជាមួយលោកស្រី Rosalyn៕ ដោយ៖លី ភីលីព
