យេរ៉ូសាឡឹម៖ ក្រសួងហិរញ្ញវត្ថុអ៊ីស្រាអែល បានកាត់បន្ថយយ៉ាងច្រើននូវការព្យាករណ៍កំណើនសេដ្ឋកិច្ចប្រចាំឆ្នាំរបស់ខ្លួនដោយសារតែជម្លោះជាមួយក្រុមហាម៉ាស នេះបើយោងតាមរបាយការណ៍ ដែលចេញផ្សាយដោយក្រសួងកាលពីថ្ងៃព្រហស្បតិ៍។
របាយការណ៍បានបញ្ជាក់ថា ឥទ្ធិពលនៃជម្លោះបច្ចុប្បន្នលើសេដ្ឋកិច្ចអ៊ីស្រាអែល លើសពីឧប្បត្តិហេតុសន្តិសុខណាមួយ ដែលប្រទេសនេះបានជួបប្រទះក្នុងអំឡុងពេលពីរទសវត្សរ៍ចុងក្រោយ ឬច្រើនជាងនេះ។
បន្ទាប់ពីកំណើន ៦,៥ភាគរយដែលបានកត់ត្រាក្នុងឆ្នាំ២០២២ របាយការណ៍នេះបានព្យាករណ៍ពីកំណើន ២ ភាគរយសម្រាប់ឆ្នាំបច្ចុប្បន្ន ពោលគឺធ្លាក់ចុះពីការព្យាករណ៍ ២,៧ ភាគរយនៅក្នុងរបាយការណ៍មុន ដែលបានចេញផ្សាយនៅក្នុងខែមិថុនា។
ប្រភពបានកត់សម្គាល់ថា មុនពេលមានជម្លោះ ក្រសួងនឹងកែសម្រួលការព្យាករណ៍ឆ្នាំ២០២៣ មកត្រឹម ៣,៤ ភាគរយ ហើយជម្លោះតែម្នាក់ឯងមានផលប៉ះពាល់ដល់ ១,៤ ភាគរយ។
ដូច្នោះហើយ ការព្យាករណ៍សម្រាប់មនុស្សម្នាក់ៗសម្រាប់ឆ្នាំ២០២៣ ដែលមានចំនួន ០,៨ភាគរយក្នុងខែមិថុនា ត្រូវបានកាត់បន្ថយមកត្រឹម ០,១ ភាគរយនៅក្នុងរបាយការណ៍បច្ចុប្បន្ន។
ដោយសារភាពមិនប្រាកដប្រជាខ្ពស់ ដែលសម្គាល់ជម្លោះ របាយការណ៍បានបង្ហាញពីសេណារីយ៉ូចំនួន៣ ទាក់ទងនឹងការព្យាករណ៍កំណើន សម្រាប់ឆ្នាំ២០២៤ ចាប់ពី ០,២ ទៅ ២,២ភាគរយ អាស្រ័យលើរយៈពេល និងកម្លាំងនៃការប្រយុទ្ធគ្នា។ តួលេខកំណើនទាំង៣ ដែលអាចកើតមានក្នុងឆ្នាំ២០២៤ គឺទាបជាងការព្យាករណ៍ពីមុន ៣,១ភាគរយ៕
ប្រែសម្រួល ឈូក បូរ៉ា
