រុស្ស៊ី ៖ វីដេអូជាច្រើន ដែលត្រូវបានបង្ហោះ នៅលើប្រព័ន្ធផ្សព្វផ្សាយសង្គម កាលពីល្ងាចថ្ងៃសុក្របង្ហាញពីពេល ការបាញ់ប្រហារដ៏ធំ បានកើតឡើង នៅមជ្ឈមណ្ឌលផ្សារទំនើប និងកន្លែងប្រគុំតន្ត្រីក្នុងរដ្ឋធានីរុស្ស៊ី ។
យោងតាមរបាយការណ៍បឋម របស់សាក្សីឃើញផ្ទាល់ភ្នែកថា ជនដៃដល់ពាក់ម៉ាស់ បានបាញ់ចេញពីកាំភ្លើងស្វ័យប្រវត្តិ និងគ្រាប់បែកដៃ។ ខ្សែវីដេអូបង្ហាញថា យ៉ាងហោចណាស់មានខ្មាន់កាំភ្លើង៥នាក់ជាប់ពាក់ព័ន្ធ ។ ព័ត៌មានផ្លូវការអំពី ឧបទ្ទវហេតុនេះនៅតែរង់ចាំ។
វីដេអូមួយបង្ហាញមនុស្ស នៅខាងក្នុងសាលប្រគុំតន្ត្រីប្រមូលផ្តុំគ្នា និងផ្នែកនៃអគារ Crocus City Hall ហើយមាននរណាម្នាក់ស្រែកថា “បិទទ្វារ” មុនពេលមានសំឡេងកាំភ្លើង ហើយបន្ទាប់មកការស្រែកចាប់ផ្តើម។
វីដេអូមួយទៀតបានថតសំឡេង នៃការបាញ់កាំភ្លើងស្វ័យប្រវត្តិ នៅក្នុងមជ្ឈមណ្ឌលផ្សារទំនើប ដែលបន្លឺឡើងពីវិចិត្រសាល ដែលគេបោះបង់ចោល ។
យោងតាមការប៉ាន់ស្មានបឋម ដោយសេវាសន្តិសុខសហព័ន្ធរុស្ស៊ី (FSB)ថា យ៉ាងហោចណាស់មនុស្ស ៤០នាក់ ត្រូវបានសម្លាប់ក្នុងការវាយប្រហារនេះ។ ដោយឡែកក្រសួងសុខាភិបាល នៃតំបន់មូស្គូបានចែករម្លែក បញ្ជីឈ្មោះមនុស្ស ១៤៤ នាក់ បានរងរបួសក្នុងឧបទ្ទវហេតុនេះ។
ពួកគេបានវាយប្រហារភ្លាមៗមុន ពេលការប្រគុំតន្ត្រីរបស់ក្រុមតន្រ្តីរ៉ុក Picnic ដែលគ្រោងធ្វើនៅល្ងាចថ្ងៃសុក្រនៅចុងម្ខាងនៃផ្សារទំនើបដ៏ធំនៅតំបន់មូស្គូ។
យោងតាម RIA Novosti ថា យ៉ាងហោចណាស់អ្នកវាយប្រហារ ៣ នាក់ បានបើកការបាញ់ប្រហារនៅខាងក្នុងកន្លែង ហើយបានប្រើគ្រាប់បែកបំផ្ទុះ ដើម្បីចាប់ផ្តើមការបាញ់ប្រហារ។ ប៉ូលីស និងសេវាសង្គ្រោះបន្ទាន់បានឆ្លើយតបទៅកន្លែងកើតហេតុ។ មិនទាន់មានព័ត៌មានអំពីអត្តសញ្ញាណ ឬហេតុផលនៃអ្នកវាយប្រហារនោះទេ ។
Crocus City Hall មានទីតាំងនៅតំបន់មូស្គូ នៅខាងក្រៅព្រំដែនរដ្ឋបាលនៃរដ្ឋធានីរុស្ស៊ី ។ អគារនេះមានសាលប្រគុំតន្ត្រី អាងចិញ្ចឹមត្រី និងកន្លែងរៀបអាពាហ៍ពិពាហ៍ រួមជាមួយនឹងហាង និងភោជនីយដ្ឋានជាច្រើន៕
ដោយ៖លី ភីលីព
