បរទេស ៖ សារព័ត៌មាន CBS News បានរាយការណ៍ កាលពីថ្ងៃសុក្រដោយដកស្រង់សម្តី មន្ត្រីមន្ទីរប៉ង់តាហ្គោនថា សហរដ្ឋអាមេរិក បានបាត់បង់នូវយន្តហោះ គ្មានមនុស្សបើក MQ-9 Reaper តម្លៃ៣០លានដុល្លារផ្សេងទៀត នៅឯឆ្នេរសមុទ្រ នៃប្រទេសយេម៉ែន ។ ខណៈដែលការស៊ើបអង្កេត លើការធ្លាក់យន្តហោះ នៅតែត្រូវបានធ្វើឡើង ស្រាប់តែក្រុមឧទ្ទាម ហួធី បានចេញមុខទទួលខុសត្រូវ ចំពោះការបាញ់ ទម្លាក់យន្តហោះនេះ ។
យោងតាមសារព័ត៌មាន RT ចេញផ្សាយនៅថ្ងៃទី២៧ ខែមេសា ឆ្នាំ២០២៤ បានឱ្យដឹងថា កាលពីមុន សហរដ្ឋអាមេរិក បានបាត់បង់យន្តហោះគ្មានមនុស្ស បើក២គ្រឿងដែរ ប្រភេទ Reapers ដោយមួយគ្រឿង ត្រូវបានគេបំផ្លាញនៅខែវិច្ឆិកា ហើយមួយទៀតត្រូវបានបំផ្លាញនៅខែកុម្ភៈ។
លោក Yahya Saree អ្នកនាំពាក្យក្រុម ដែលមានទំនាក់ទំនងជាមួយអ៊ីរ៉ង់ ក៏បានអះអាងកាលពីថ្ងៃសៅរ៍ថា ក្រុមសកម្មប្រយុទ្ធបានកំណត់គោលដៅលើ “នាវាប្រេងរបស់អង់គ្លេស Andromeda Star” នៅក្នុងសមុទ្រក្រហម ជាមួយនឹងកាំជ្រួចកងទ័ពជើងទឹក ហើយបានវាយប្រហារដោយផ្ទាល់។
យោធាអាមេរិកបានបញ្ជាក់ថា ក្រុមឧទ្ទាមហួធី បានបាញ់មីស៊ីលផ្លោងប្រឆាំង នាវាចំនួន ៣ គ្រាប់នៅតំបន់នោះ ទៅកាន់គោលដៅជាច្រើន និងធ្វើឱ្យខូចខាតដល់នាវាអង់គ្លេស ។ នាវា “MV Andromeda Star រាយការណ៍ ពីការខូចខាតតិចតួច ប៉ុន្តែកំពុងបន្តដំណើររបស់ខ្លួន” ទីបញ្ជាការកណ្តាល របស់សហរដ្ឋអាមេរិក (CENTCOM) បាននិយាយ នៅក្នុងការបង្ហោះនៅលើ X ដោយបន្ថែមថា សម្ព័ន្ធយោធាដែនសមុទ្រ មិនបានរាយការណ៍ពីការ រងរបួសឬការខូចខាតណាមួយឡើយ។
ក្រុមឧទ្ទាម ហួធី ដែលអះអាងថា ជារដ្ឋាភិបាលនៃប្រទេសយេម៉ែន បាននិងកំពុងវាយប្រហារលើកប៉ាល់ដែលពាក់ព័ន្ធជាមួយអ៊ីស្រាអែលនៅសមុទ្រក្រហម និងឈូងសមុទ្រ Aden ចាប់តាំងពីចុងខែតុលា ដើម្បីជាការឆ្លើយតបទៅនឹងការវាយ លុករបស់អ៊ីស្រាអែលប្រឆាំងនឹងតំបន់ហ្គាហ្សា។ ពួកសកម្មប្រយុទ្ធបានប្តេជ្ញា បន្តយុទ្ធនាការរបស់ពួកគេ រហូតដល់រដ្ឋជ្វីហ្វបញ្ឈប់ការ វាយលុករបស់ខ្លួនលើតំបន់ប៉ាឡេស្ទីន៕
ប្រែសម្រួលៈ ណៃ តុលា
