បរទេស៖ សារព័ត៌មាន ABC News បានបញ្ជាក់ថា លោក ដូណាល់ ត្រាំ និង លោកស្រី Harris បានយល់ព្រមចូលរួមក្នុងការជជែកដេញដោលគ្នាដោយផ្ទាល់ នៅក្នុងព្រឹត្តិការណ៍មួយដែលរៀបចំដោយបណ្តាញ ABC News កាលពីថ្ងៃទី១០ ខែកញ្ញា។
យោងតាមសារព័ត៌មាន VN EXPRESS ចេញផ្សាយនៅថ្ងៃទី៩ ខែសីហា ឆ្នាំ២០២៤ បានឱ្យដឹងថា ABC News បានប្រកាសនៅថ្ងៃទី៨ ខែសីហាថា “ABC News នឹងរៀបចំការជជែកដេញដោលសម្រាប់បេក្ខជនប្រធានាធិបតីដែលមានសមត្ថភាពនៅថ្ងៃទី១០ ខែកញ្ញា។ អនុប្រធានាធិបតីលោកស្រី Kamala Harris និងអតីតប្រធានាធិបតី លោក ដូណាល់ ត្រាំ ទាំងពីរនាក់បានបញ្ជាក់ពីការចូលរួមរបស់ពួកគេផងដែរ” ។
ការប្រកាសនេះធ្វើឡើងបន្ទាប់ពីបេក្ខជនប្រធានាធិបតីខាងគណបក្សសាធារណរដ្ឋលោក ត្រាំ បាននិយាយថា លោកកំពុងតែទន្ទឹងរង់ចាំការជជែកដេញដោលគ្នាពីគូប្រជែងគណបក្សប្រជាធិបតេយ្យរបស់លោក។ លោកបានយល់ព្រមចូលរួមក្នុងព្រឹត្តិការណ៍ដែលរៀបចំដោយ Fox News, ABC News និង NBC News នៅថ្ងៃទី ៤, ១០ និងថ្ងៃទី២៥ ខែកញ្ញា។
លោក ដូណាល់ ត្រាំ បាននិយាយនៅក្នុងសន្និសីទកាសែតនៅ Palm Beach រដ្ឋ Florida នៅថ្ងៃទី៨ ខែសីហាថា “ខ្ញុំសង្ឃឹមថា លោកស្រីទទួលយក” ។
អនុប្រធានាធិបតី លោកស្រី Harris បាននិយាយថា លោកស្រីទន្ទឹងរង់ចាំចំពោះព្រឹត្តិការណ៍របស់ ABC News ។ លោកស្រីបានប្រាប់អ្នកយកព័ត៌មាននៅទីក្រុង Detroit រដ្ឋ Michigan ថា “ខ្ញុំបើកចំហឱ្យមានការជជែកដេញដោលមួយទៀតបន្ទាប់ពីថ្ងៃទី១០ ខែកញ្ញា” ។
ព័ត៌មានអំពីទីតាំង ច្បាប់ជជែកដេញដោល និងអ្នកសម្របសម្រួល មិនទាន់ត្រូវបានប្រកាស នៅឡើយទេ។
យុទ្ធនាការ Trump និង Biden ពីមុនបានយល់ព្រមចូលរួមក្នុងការជជែកដេញដោលចំនួនពីរដែលរៀបចំដោយ CNN នៅថ្ងៃទី ២៧ ខែមិថុនា និង ABC News នៅថ្ងៃទី ១០ ខែកញ្ញា។ លោក Biden បានធ្លាក់ចេញពីការប្រណាំងនៅចុងខែកក្កដា បន្ទាប់ពីការសម្តែងដ៏ខកចិត្តប្រឆាំងនឹងគូប្រជែងរបស់គាត់នៅក្នុងព្រឹត្តិការណ៍របស់ CNN ។
ប្រភព ABC News បាននិយាយថាព្រឹត្តិការណ៍នេះនឹងជាលើកដំបូងដែលលោក ត្រាំ និង លោកស្រី Harris ជជែកដេញដោលគ្នា ខណៈដែលយុទ្ធនាការរបស់បេក្ខជនគណបក្សប្រជាធិបតេយ្យបានបង្ហាញថា វានឹងមិនចូលរួមក្នុងកម្មវិធី Fox News នោះទេ។ អ្នកធ្វើយុទ្ធនាការ Harris ក៏មិនទទួលយកការផ្តល់ជូនពី NBC News ផងដែរ។
ការស្ទង់មតិរបស់ Ipsos/Reuters ចេញផ្សាយនៅថ្ងៃទី៨ ខែសីហា បានបង្ហាញថា លោកស្រី Harris និង លោក ត្រាំ មានអត្រាគាំទ្រ 42% និង 37% រៀងគ្នា។ ការស្ទង់មតិនេះត្រូវបានធ្វើឡើងនៅថ្ងៃទី២-៧ ខែសីហា ជាមួយនឹងមនុស្សពេញវ័យអាមេរិកជាង ២.០០០នាក់ ។ លោកស្រី Harris បានបង្កើនការនាំមុខលើលោក ត្រាំ ពី 37% ទៅ 34% នៅក្នុងការស្ទង់មតិកាលពីថ្ងៃទី២២-២៣ ខែកក្កដា៕
ប្រែសម្រួលៈ ណៃ តុលា
