កូរ៉េខាងត្បូង ៖ នេះបើយោងតាមមន្ត្រីប៉ូលិសជាន់ខ្ពស់ម្នាក់ ដែលបានដកស្រង់ ដោយទីភ្នាក់ងារព័ត៌មាន Yonhap ថា ប៉ូលីសកូរ៉េខាងត្បូង កំពុងស៊ើបអង្កេត វេទិកាផ្ញើសារ Telegram ទាក់ទង នឹងឧក្រិដ្ឋកម្មផ្លូវភេទតាមប្រព័ន្ធអ៊ីនធើណេត ខណៈប្រទេសនេះ កំពុងព្យាយាមដោះស្រាយរឿង អាសអាភាសក្លែងក្លាយយ៉ាងជ្រៅដោយផ្តោតលើស្ត្រីវ័យក្មេង យោងតាមការចេញ ផ្សាយពីគេហទំព័រ RT ។
ប្រធានការិយាល័យស៊ើបអង្កេត ជាតិ លោក Woo Jong-soo បានប្រាប់ប្រព័ន្ធផ្សព្វផ្សាយថា កាលពីសប្តាហ៍មុន ប៉ូលីសក្នុងតំបន់បានទទួល របាយការណ៍ចំនួន ៨៨ នៃរឿងអាសអាភាសក្លែងក្លាយ ។ ការស៊ើបអង្កេតនេះបានកើតឡើងមួយសប្តាហ៍ បន្ទាប់ពីការចាប់ខ្លួននាយកប្រតិបត្តិ និងស្ថាបនិកលោក Pavel Durov នៅប្រទេសបារាំង។
លោក Woo បានបញ្ជាក់ថា ដូចដែលប្រទេសបារាំងបានធ្វើ ភ្នាក់ងារប៉ូលីសក្រុងសេអ៊ូលបានបើកការស៊ើបអង្កេតផ្ទៃក្នុងទៅលើអង្គភាពសាជីវកម្ម Telegram មុនពេលរារាំងជាផ្លូវការ ដោយបន្ថែមថា ការស៊ើបអង្កេត នឹងពិនិត្យយ៉ាងដិតដល់ថា តើខ្លួនបាននឹងកំពុងបំពានលើការ ចែកចាយមាតិកាក្លែងក្លាយ ដែលមានលក្ខណៈស្រើបស្រាល ។
លោកបានបន្ថែមថា ការគ្រប់គ្រងនៃវេទិកាផ្ញើសារ មិនងាយស្រួលផ្តល់ទិន្នន័យស៊ើបអង្កេត ដូចជាព័ត៌មានគណនីដល់អាជ្ញាធររដ្ឋ រួមទាំងអ្នកប្រើប្រាស់នៅអាមេរិក។ ប៉ូលីសកូរ៉េខាងត្បូង គ្រោងនឹងសហការជាមួយអាជ្ញាធរស៊ើបអង្កេតបារាំង និងស្ថាប័នអន្តរជាតិ ជាផ្នែកមួយនៃការស៊ើប អង្កេតរបស់ខ្លួនលើ Telegram ។
កម្មវិធីស្វ័យប្រវត្តិចំនួន ៨ បាន បង្កើតរូបភាពអាសអាភាសក្លែងក្លាយ ដែលរីករាលដាលតាមរយៈ Telegram កំពុងស្ថិតក្រោមការត្រួតពិនិត្យ ជាផ្នែកនៃការស៊ើបអង្កេត ក៏ដូចជាចំណុចជជែកជាក្រុម ដែលទទួលខុសត្រូវក្នុងការផ្សព្វផ្សាយខ្លឹមសារបែបនេះ។
លោក Durov ត្រូវបានចាប់ខ្លួន កាលពីថ្ងៃសៅរ៍មុនភ្លាមៗ បន្ទាប់ពីបានមកដល់អាកាសយានដ្ឋាន Paris-Le Bourget ហើយចាប់តាំងពីពេលនោះមក ត្រូវបានចោទប្រកាន់ពីបទល្មើស ជាច្រើន រួមទាំងភាពស្មុគស្មាញក្នុងការគ្រប់គ្រង ប្រព័ន្ធអនឡាញប្រើដោយក្រុមឧក្រិដ្ឋជន ដើម្បីធ្វើសកម្មភាពខុសច្បាប់ និងការបដិសេធមិនសហការ ជាមួយអ្នកស៊ើបអង្កេត ៕
