បរទេស៖ យោងតាមការចេញផ្សាយរបស់ RT អវកាសយានិករុស្ស៊ី Oleg Kononenko និង Nikolai Chub បានបំបែកឯតទគ្គកម្មសម្រាប់បេសកកម្មបន្តវែងបំផុតនៅលើស្ថានីយ៍អវកាសអន្តរជាតិ (ISS) ដោយបានចំណាយពេលជាងមួយឆ្នាំនៅក្នុងគន្លងគោចរ។
Kononenko និង Chub បានចូលទៅក្នុងសៀវភៅកំណត់ត្រានៅម៉ោង៤នាទី០៦ និងវិនាទី៥១នាទីម៉ោងនៅទីក្រុងមូស្គូកាលពីថ្ងៃសុក្រ នៅពេលដែលពួកគេបានបំបែកកំណត់ត្រាពីមុនដែលកំណត់ដោយមិត្តរួមការងារអវកាសយានិក Sergei Prokopyev និង Dmitry Petelin និងអវកាសយានិកអាមេរិក Francisco Rubio ដែលបានចំណាយពេល ៣៧០ថ្ងៃ ២១ម៉ោង២២នាទី និង 16 វិនាទីនៅលើ ISS ពីខែកញ្ញា ២០២២ ដល់ ខែកញ្ញា ២០២៣ ។
ទីភ្នាក់ងារអវកាសរុស្ស៊ី Roscosmos បាននិយាយនៅក្នុងសេចក្តីថ្លែងការណ៍មួយថា នៅពេលដែលពួកគេត្រឡប់មកផែនដីវិញនៅលើយាន Soyuz-MS នៅថ្ងៃចន្ទ Kononenko និង Chub នឹងចំណាយពេល៣៧៤ថ្ងៃនៅ ក្នុងលំហ។
គួរឲ្យដឹងដែរថាអវកាសយានិកទាំងពីរនាក់បានមកដល់ ISS កាលពីថ្ងៃទី ១៥ ខែកញ្ញាឆ្នាំមុនហើយ បេសកកម្មនេះគឺជាដំណើរដំបូងរបស់ Chub ទៅកាន់ទីអវកាស ប៉ុន្តែជាលើកទីប្រាំរបស់ Kononenko ។
កាលពីខែកុម្ភៈ Kononenko បានបំបែកឯតទគ្គកម្មពិភពលោកសម្រាប់ពេលវេលាច្រើនបំផុតក្នុងលំហដោយមនុស្សតែម្នាក់ ពោលគឺ៨៧៨ថ្ងៃ និង ១១ម៉ោងដែលធ្លាប់បានកំណត់ត្រាដោយអវកាសយានិករុស្ស៊ី Gennady Padalka ក្នុងឆ្នាំ២០១៥៕
ប្រែសម្រួល៖ ស៊ុនលី
