បរទេស៖ សារព័ត៌មាន Bild របស់អាល្លឺម៉ង់បានរាយការណ៍កាលពីថ្ងៃព្រហស្បតិ៍ ដោយដកស្រង់សម្តីមន្ត្រីជាន់ខ្ពស់អ៊ុយក្រែនម្នាក់ថា ទីក្រុងគៀវ មានសមត្ថភាពផលិតអាវុធនុយក្លេអ៊ែរ “ក្នុងរយៈពេលពីរបីសប្តាហ៍” បាន។
យោងតាមសារព័ត៌មាន RT ចេញផ្សាយនៅថ្ងៃទី១៧ ខែតុលា ឆ្នាំ២០២៤ បានឱ្យដឹងថា របាយការណ៍នេះកើតឡើងបន្ទាប់ពីលោក Vladimir Zelensky ប្រធានាធិបតីអ៊ុយក្រែន បានលើកឡើងពីលទ្ធភាពបែបនេះក្នុងអំឡុងពេលដំណើរទស្សនកិច្ចទៅកាន់ទីក្រុង Brussels នៅថ្ងៃតែមួយនោះ។ មេដឹកនាំអ៊ុយក្រែនបានអះអាងថា ប្រទេសរបស់លោកត្រូវការអាវុធនុយក្លេអ៊ែរ ឬ ចូលជាសមាជិករបស់អង្គការណាតូ។
បច្ចុប្បន្ន លោក Zelensky កំពុងផ្សព្វផ្សាយ ‘ផែនការជ័យជំនះ’ របស់លោកទៅកាន់អ្នកគាំទ្រលោកខាងលិចរបស់អ៊ុយក្រែន ដែលលោកបានអះអាងថា អាចបញ្ចប់ជម្លោះជាមួយរុស្ស៊ី។
ឥឡូវនេះ សារព័ត៌មាន Bild របស់អាល្លឺម៉ង់ បានលាតត្រដាងថា មន្ត្រីអ៊ុយក្រែនម្នាក់ដែលពាក់ព័ន្ធនឹងការទទួលបានសព្វាវុធបានអះអាង កាលពី”ប៉ុន្មានខែមុន” ថា ទីក្រុងគៀវ មានឆន្ទៈក្នុងការផលិតអាវុធនុយក្លេអ៊ែរ។
មន្ត្រីដែលមិនបញ្ចេញឈ្មោះបាននិយាយថា “យើងមានសម្ភារៈ យើងមានចំណេះដឹង។ ប្រសិនបើការបទបញ្ជាដែលត្រូវបានផ្តល់ឱ្យ នោះយើងនឹងត្រូវការតែប៉ុន្មានសប្តាហ៍ប៉ុណ្ណោះ ដើម្បីទទួលបានគ្រាប់បែកដំបូង” នេះបើយោងតាមកាសែតអាល្លឺម៉ង់។ មន្រ្តីរូបនោះបានបន្ថែមថា លោកខាងលិចគួរតែ «គិតបានតិចជាងអំពីខ្សែក្រហមរបស់រុស្ស៊ី និងច្រើនទៀតអំពីប្រទេសយើង»។
ទោះបីជាយ៉ាងណាក៏ដោយ ទីប្រឹក្សារបស់ Zelensky គឺលោក Dmitry Litvin បានបដិសេធរបាយការណ៍របស់ Bild ដោយប្រាប់សារព័ត៌មានអ៊ុយក្រែន Strana កាលពីថ្ងៃព្រហស្បតិ៍ថា វា “មិនសមហេតុសមផល” ហើយបានលើកឡើងថា កាសែតអាឡឺម៉ង់ “អាចច្រឡំជាមួយនឹងការឃោសនារបស់រុស្ស៊ី” ៕
ប្រែសម្រួលៈ ណៃ តុលា
