កូនស្ត្រីថ្លើមធំម្នាក់ អត់លុយសងបំណុលគេ ប្រើល្បិចចាប់ជំរិតខ្លួនឯងដើម្បីទារប្រាក់ ២០ ម៉ឺនដុល្លារពីឪពុករបស់នាង

វៀតណាម៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា ស្ត្រីម្នាក់នៅខេត្ត Dong Thap ភាគខាងត្បូងត្រូវបានចាប់ខ្លួនពីបទចាប់ជំរិតខ្លួនឯងក្នុងការប៉ុនប៉ងបោកប្រាស់ឪពុករបស់នាងចំនួន ៥ ពាន់លានដុង ស្មើនឹង ២០០,០០០ដុល្លារអាមេរិក) ។

អាជ្ញាធរបាននិយាយថា នាង Ngo Thi Bich Tram អាយុ ៣៣ឆ្នាំ ត្រូវបានឃុំខ្លួនកាលពីថ្ងៃសុក្រ រួមជាមួយអ្នកសមគំនិត Tran Minh Trung អាយុ ២៧ ឆ្នាំនិង Nguyen Van Nha អាយុ ៣២ឆ្នាំ ដោយពួកគេបានរៀបចំផែនការជំរិតទារប្រាក់។

ការស៊ើបអង្កេតមួយបានបង្ហាញថា នាង Tram បានខ្ចីលុយពីលោក Trung និងលោក Nha ម្តងហើយម្តងទៀត។ ដើម្បីរកលុយសងបំណុលរបស់នាង និងធានាបាននូវមូលនិធិបន្ថែម នាងបានបង្កើតគម្រោងមួយដែលនាងធ្វើពុតថា ត្រូវបានចាប់ពង្រត់ដោយក្រុមក្មេងទំនើង បន្ទាប់មកនាងបានទាក់ទងទៅឪពុកអាយុ ៦០ឆ្នាំ ដោយអង្វររកជំនួយ។

លោក Trung និងលោក Nha បានធ្វើការហៅគំរាមកំហែងទៅកាន់ឪពុករបស់នាង ដោយទាមទារប្រាក់លោះចំនួន ៥ពាន់លានដុង សម្រាប់ការដោះលែងនាង។ ដោយខ្លាចសុវត្ថិភាពកូនស្រី ឪពុកបានរាយការណ៍ពីហេតុការណ៍នេះទៅប៉ូលិស ដែលក្រោយមកបានរកឃើញការប្រចណ្ឌ។

តាមការសារភាពរបស់នាង Ngo Thi Bich Tram នេះមិនមែនជាលើកទីមួយទេ ដែលនាងប្រើគម្រោងបែបនេះ។ ពីមុននាងបានបញ្ឆោតឪពុករបស់នាងឲ្យផ្ញើប្រាក់ឲ្យនាងប្រហែល ៥០០លានដុង (២០,០០០ដុល្លារ) ក្នុងកាលៈទេសៈស្រដៀងគ្នានេះ។

នាង Ngo Thi Bich Tram បានសារភាពថា ដោយសារតែការស្រលាញ់ និងក្តីបារម្ភរបស់ឪពុកនាងទើបរៀបចំផែនការជំរិតទារប្រាក់ម្តងហើយម្តងទៀត៕