អូស្ត្រាលី ៖ យោងតាមការចេញ ផ្សាយពីគេហទំព័រ VN Express បានប្រាប់ឲ្យដឹងថា សាកលវិទ្យាល័យកំពូលទាំង ១០ របស់ប្រទេសអូស្ត្រាលី ត្រូវបានកំណត់ឲ្យគិតថ្លៃចន្លោះពី ២៦,៥០០ ដុល្លារអូស្ត្រាលី ទៅ ១១៣,០០០ ដុល្លារអូស្រ្តាលី (១៧,៧៧៨ – ៧៥,៨២៣ ដុល្លារអាមេរិក) សម្រាប់ឆ្នាំសិក្សាខាងមុខ អាស្រ័យលើកម្មវិធីសិក្សា។
យោងតាមចំណាត់ ថ្នាក់សាកលវិទ្យាល័យ 2025 Times Higher Education (THE) បានចេញផ្សាយកាលពីសប្តាហ៍មុនបាននិយាយថា អូស្ត្រាលី មានសាកលវិទ្យាល័យចំនួន ១០ ដែលបានចុះបញ្ជីក្នុងចំណោមសាកលវិទ្យាល័យកំពូលទាំង ២០០ នៅទូទាំងពិភពលោក។
សាកលវិទ្យាល័យ Melbourne នាំមុខគេ ដោយជាប់ចំណាត់ថ្នាក់ទី ៣៩ នៅទូទាំងពិភពលោក តាមពីក្រោយដោយស្ថាប័នល្បីៗផ្សេងទៀតដូចជា សាកលវិទ្យាល័យ Monash សាកលវិទ្យាល័យ Sydney សាកលវិទ្យាល័យជាតិអូស្ត្រាលី និងសាកលវិទ្យាល័យ Queensland ។
សម្រាប់ឆ្នាំ ២០២៥ ថ្លៃសិក្សា របស់និស្សិតអន្តរជាតិនៅសាកលវិទ្យាល័យទាំងនេះនឹងមានចាប់ពី២៦,៥០០ ដុល្លារអូស្ត្រាលី ទៅ ១១៣,០០០ ដុល្លារអូស្រ្តាលី ដែលតំណាង ឲ្យការកើនឡើងប្រហែល ២,០០០-៣,០០០ ដុល្លារអូស្រ្តាលី បើធៀបនឹងអត្រាបច្ចុប្បន្ន។ ថ្លៃសេវាខ្ពស់បំផុតគឺ សម្រាប់ឱសថព្យាបាល នៅសាកលវិទ្យាល័យ Melbourne (១១៣,០០០ ដុល្លារអូស្រ្តាលី) បន្ទាប់មក ផ្នែកការវះកាត់មាត់នៅសាកលវិទ្យាល័យ Adelaide ។
តម្លៃសិក្សាទាបបំផុតអនុវត្តចំពោះកម្មវិធីតន្ត្រី ការស្រាវជ្រាវ និងសិល្បៈសម្តែងនៅសាកលវិទ្យាល័យ Melbourne មានតម្លៃ ២៦,៥០០ ដុល្លារអូស្រ្តាលី។ ជាទូទៅ កម្មវិធីក្នុងវិស័យសិល្បៈ ការអប់រំ វិទ្យាសាស្ត្រសង្គម និងមនុស្សសាស្ត្រមានតម្លៃទាបជាង។
បន្ថែមពីលើថ្លៃសិក្សា និស្សិតអន្តរជាតិ ត្រូវរ៉ាប់រងលើការធានារ៉ាប់រងសុខភាព (OSHC) ថ្លៃសេវា និងថ្លៃសេវាសិស្ស (SSAF) និងថ្លៃសេវាពាក់ព័ន្ធ ផ្សេងទៀត ។ តម្លៃនៃការរស់នៅសម្រាប់និស្សិតអន្តរជាតិនៅប្រទេសអូស្ត្រាលីត្រូវបានប៉ាន់ប្រមាណថាមានចាប់ពី ២០,០០០ ដុល្លារអូស្ត្រាលី ទៅ ៣៩,០០០ ដុល្លារអូស្រ្តាលីក្នុងមួយឆ្នាំ។
អូស្ត្រាលីនៅតែជាគោលដៅពេញនិយមសម្រាប់និស្សិតអន្តរជាតិ ដែលបច្ចុប្បន្នមាននិស្សិតជិត ៨០០,០០០ មកពីបរទេស។ វៀតណាមជាប់ចំណាត់ថ្នាក់ទី ៥ក្នុងចំណោមប្រទេសមាននិស្សិតអន្តរជាតិច្រើនជាងគេនៅប្រទេសអូស្ត្រាលី មានសិស្សជាង ៣៦,០០០ នាក់ តាមពីក្រោយប្រទេសចិន ឥណ្ឌា នេប៉ាល់ និងហ្វីលីពីន៕
