វ៉ាស៊ីនតោន ៖ មន្ត្រីអាមេរិកកំពុង ជួយការពារជនជាតិ អាមេរិកក្នុងព្រឹត្តិការណ៍ អូឡាំពិករដូវរងាខែក្រោយ កំពុងបង្កើនផែនការ សម្រាប់ការរំខាន ដែលអាចកើតមាន ពីយន្តហោះគ្មានមនុស្សបើក ចាប់ពីការថតខុសច្បាប់ លើទីកន្លែងរហូតដល់សេណារីយ៉ូអាក្រក់បំផុតពាក់ព័ន្ធនឹងបន្ទុក ផ្ទុះយោងតាមការចេញផ្សាយពីគេហទំព័រ Japan Today ។
ការគំរាមកំហែងនៃការវាយប្រហារ ដោយយន្តហោះគ្មាន មនុស្សបើកបានទាក់ទាញ ការចាប់អារម្មណ៍កាន់តែខ្លាំងឡើង ចាប់តាំងពីសង្គ្រាមនៅ អ៊ុយក្រែនបានបង្ហាញ ពីសមត្ថភាពដ៏សាហាវរបស់ពួកគេ ហើយរដ្ឋាភិបាលអាមេរិកថ្មីៗនេះ បានបង្កើនការចំណាយលើបច្ចេកវិទ្យាប្រឆាំងយន្តហោះគ្មានមនុស្សបើក។
យន្តហោះគ្មានមនុស្សបើកក៏បានរំខានដល់ដែនអាកាសនៅទូទាំងទ្វីបអឺរ៉ុបក្នុងរយៈពេលប៉ុន្មានខែថ្មីៗនេះ ខណៈយន្តហោះគ្មានមនុស្សបើកដែលមានតម្លៃទាបបានក្លាយជាបញ្ហាប្រឈមប្រចាំថ្ងៃសម្រាប់ព្រឹត្តិការណ៍កីឡាសំខាន់ៗ។
លោក Tim Ayers នាយកផ្នែក សម្របសម្រួលព្រឹត្តិការណ៍សំខាន់ៗ នៃសេវាសន្តិសុខការទូត (DSS) របស់ក្រសួងការបរទេស អាមេរិកបាននិយាយក្នុងបទសម្ភាសន៍មួយថា អាជ្ញាធររបស់យើង តែងតែតាមដានជានិច្ច។ លោក Ayers បានពិពណ៌នា អំពីយន្តហោះ គ្មានមនុស្សបើកថា ជាបញ្ហាដ៏ធំមួយដែលប្រទេសម្ចាស់ផ្ទះ និងក្រុមសន្តិសុខមក ទស្សនាឥឡូវនេះ ចាត់ទុកជាប្រភេទគំរាមកំហែង។
មន្ត្រីអាមេរិក បាននិយាយថា ប៉ូលីសអ៊ីតាលី និងសមភាគីយោធា របស់ពួកគេកំពុងរៀបចំប្រព័ន្ធរឹតបន្តឹង និងត្រួតពិនិត្យ នៅជុំវិញ ទីកន្លែងក្រៅភ្នំសម្រាប់ការប្រកួតកីឡា Milano Cortina ជាកន្លែងដែលយន្តហោះ គ្មានមនុស្សបើកពិបាកគ្រប់គ្រង និងងាយស្រួលលាក់បាំង៕
