ផ្លូវជិះកង់ដ៏វែងបំផុតនៅក្នុងប្រទេសថៃ និងនៅអាស៊ាន ដែនដីប្រជាជាតិអាស៊ីអាគ្នេយ៍ទាំងមូល ត្រូវបានរដ្ឋាភិបាលថៃសម្ពោធ ដាក់ឲ្យប្រើប្រាស់ឲ្យក្នុងនោះ មានប្រជាជនជាច្រើន ចូលរួមជិះកង់លើផ្លូវថ្មីនោះ។
តាមការផ្សាយពីសារព័ត៌មានថៃ ផ្លូវនោះមានចម្ងាយមួយជុំធំ ២៣គីឡូម៉ែត្រ សម្រាប់អ្នកពូកែជិះកង់ អាជីព និងមិនអាជីព ហើយមួយផ្នែកទៀតមានចម្ងាយ ១,៦គីឡូម៉ែត្រ សម្រាប់អ្នករត់ហាត់ប្រាណ និងជិះកង់រយៈចម្ងាយខ្លី។ លក្ខណៈពិសេសដោយឡែកមួយទៀត របស់ផ្លូវកង់នេះគឺធ្វើព័ទ្ធជុំវិញប្រលានយន្តហោះអន្តរជាតិសុវណ្ណភូមិ នាទីក្រុងបាងកក អាចមើលឃើញទិដ្ឋភាពយន្តហោះឡើងចុះយ៉ាងប្លែកភ្នែក។
ផ្លូវត្រូវបានបែងចែកជាពីរគន្លង គឺពណ៌ស្វាយ សម្រាប់អ្នកជិះកង់កម្រិតអាជីព Pro និងពណ៌ខៀវសម្រាប់អ្នកជិះកម្សាន្ត ឬចាប់ផ្ដើមសាកល្បង ដែលស្ថិតនៅដំណាក់កាលដំបូង Beginner។ ថវិកាឧបត្ថម្ភ បានមកពីធនាគារពាណិជ្ជស្យាម Siam Commercial Bank។
ផ្លូវនេះគឺជាផ្នែកមួយ នៃកម្មវិធីរបស់រដ្ឋាភិបាល ដែលមានឈ្មោះថា ពលរដ្ឋថៃមានសុភមង្គលឡើងវិញ និងមានបំណងលើកកម្ពស់ការជិះកង់ ដោយចាត់ទុកថា ជាមធ្យោបាយរក្សាសុខភាពនិងលើកទឹកចិត្តឲ្យពលរដ្ឋចូលចិត្តហាត់ប្រាណ។ គម្រោងនេះ ក៏នឹងជួយជំរុញវិស័យទេសចរណ៍នៅក្នុងប្រទេសថៃ ក្រោយចប់វិបត្តិកូវីដនៅថ្ងៃអនាគត៕ ប្រភព៖ sabay
