កាំភ្លើងធំ Arsenal ក្នុងពេល ដែលកំពុងព្យាយាមពង្រឹង ទំរង់លេងរបស់ក្លឹបឡើងវិញ នោះខ្លួនក៏មិនសូវ ជាមានផែនការលក់កីឡាករ វ័យក្មេងៗ របស់ខ្លួនចេញនោះឡើយ ជាក់ស្តែង កីឡាករ ខ្សែបម្រើ វ័យទើបតែ ២០ឆ្នាំម្នាក់ ដែលត្រូវបានក្លឹប Aston Villa ដាក់សំណើរហូតទៅដល់៣០លានផោន ប៉ុន្តែបានត្រឹមការបដិសេធប៉ុណ្ណោះ ។
Arsenal បដិសេធសំណើរបស់ Villa ដើម្បីសុំទិញ កីឡាករ Emile Smith Rowe ជាមួយនឹងកញ្ចប់ប្រាក់ រហូតទៅដល់៣០លានផោន ដែលបានធ្វើឡើង កាលពីសប្តាហ៍មុនក្រោយបាន សម្រេចចិត្តយ៉ាងច្បាស់ហើយថា គាត់នឹងមិនត្រូវបាន លក់ចេញ ជាដាច់ខាតនៅរដូវក្តៅនេះ។
គួរឲ្យដឹងដែរថា កីឡាករ ដែលដុះចេញពីថ្នាល យុវជនរូបនេះបច្ចុប្បន្ននៅសល់កុងត្រា ត្រឹមតែ២ឆ្នាំទៀតប៉ុណ្ណោះ ជាមួយនឹងក្លឹបហើយកិច្ចពិភាក្សាគ្នា រវាងក្លឹបនិងភ្នាក់ងារកីឡាករ ក៏កំពុងតែបន្ត នៅឡើយដែរដោយសង្ឃឹមថា កីឡាកររូបនេះនឹងអាចបន្តកុងត្រាថ្មី ជាមួយនឹងក្លឹប៕
ប្រែសម្រួល៖ស៊ុនលី
