លោក Jamie Carragher បាននិយាយថា អ្នកដែលស្គាល់និងស្និទ្ធជាមួយក្រុមហង្សក្រហម Liverpool ជឿជាក់ថានៅឆ្នាំនេះ ក្រុមនឹងអាចឈ្នះពានរង្វាន់លីគកំពូលអង់គ្លេសបាន ។
ក្រុមរបស់លោក Jurgen Klopp បានយកឈ្នះលើក្រុម Arsenal ក្នុងលទ្ធផល ២-០។ ដោយ២គ្រាប់នោះដែរ សម្រេចបានដោយកីឡាករ Diogo Jota នាទី៥៤ និង Roberto Firmino នៅនាទី៦២។ ជ័យជម្នះនេះដែរ ល្មមសម្រាប់ឱ្យក្រុម Liverpool យក៣ពិន្ទុបន្ថែមទៀត និងឡើងទៅកៀកក្រុមកំពូលតារាង Manchester City មែនទែនហើយ។ គម្លាតរបស់ពួកគេនៅពេលនេះ សល់ត្រឹម១ពិន្ទុប៉ុណ្ណោះ ហើយក្រុមទាំងពីរក៏នៅប៉ះគ្នាប្រកួតខាងមុខទៀតដែរ។
ដោយសារតែមានឱកាសនេះហើយ ទើបបានជាលោក Jamie Carragher បាននិយាយថា៖ “ខ្ញុំគិតថាគ្រប់គ្នាដែលមានទំនាក់ទំនងជាមួយក្លឹប Liverpool នឹងជឿថាពួកគេអាចឈ្នះពានបាន។ វាជាពេលដំបូងដែលខ្ញុំគិតថាអាចធ្វើបាននារដូវកាលនេះ។ កន្លងមកខ្ញុំតែងគិតជានិច្ចថាវាជាឆ្នាំរបស់ Man City ហើយ តែពេលនេះពួកគេនៅលើសត្រឹម១ពិន្ទុប៉ុណ្ណោះ។ អ្វីដែល Liverpool កំពុងមាន និងប្រកួតខាងមុខ ពួកគេនឹងអាចឡើងទៅកំពូលតារាងបាន”៕
