កីឡា

ឃើញ​ក្រុម​កំពុង​ធ្លាក់​ទឹក Ronaldo មិន​សម្រាក​យូរ​មក​ហាត់​មុន ​កំណត់​ត្រៀម​ប៉ះ Arsenal

Cristiano Ronaldo បាន​ត្រលប់​​មក​ជំរុំ​ហ្វឹកហាត់​​របស់ Manchester United កាល​ពី​ម្សិលមិញ ដែល​គេ​ការ​បង្ហាញ​ខ្លួន​ជា​លើក​ដំបូង​ចាប់​តាំង​ពី​ប្រកាស​ដំណឹង​បាត់បង់​កូន​ប្រុស។

កីឡាករ​​សញ្ជាតិ​ព័រទុយហ្គាល់​វ័យ​៣៧​ឆ្នាំ​ត្រូវ​បាន​ប្រទះ​ឃើញ​ចាកចេញ​ពី​ជំរុំ​ហាត់ Carrington ប្រមាណ​៤៨​ម៉ោងក្រោយ​បញ្ចេញ​ដំណឹង​ក្រៀមក្រំ​ទៅ​កាន់​ពិភពលោក។ Ronaldo និង​គូស្នេហ៍ Geogina Rodriguez បាន​ប្រកាស​កាល​ពី​ថ្ងៃ​ច័ន្ទ​ថា កូន​ទើប​តែ​សម្រាល​​ម្នាក់​ក្នុង​ចំណោម​កូន​ភ្លោះ​របស់​ខ្លួន​បាន​ស្លាប់​បាត់បង់​ជីវិត។

បន្ទាប់​ពី​ទទួល​បាន​ដំណឹង​​នេះ​ក្លឹប Manchester United បាន​ផ្ដល់​ពេលវេលា​ឲ្យ​ Ronaldo សម្រាក​តាម​តែ​​ចិត្ត​ចង់ និង​មិន​បាច់​​បង្ហាញ​ខ្លួន​ប្រកួត​ទល់​នឹង Liverpool ឡើយ។ អវត្តមាន Ronaldo ​ក្លឹប​បិសាច​ក្រហម​បាន​ចាញ់​ហង្សក្រហម​ដល់​ទៅ ៤-០។ តែ​ក្នុង​ការ​ប្រកួត​នោះ​​អ្នក​គាំទ្រ​ទាំង​សងខាង​​បាន​នាំ​គ្នា​រំលែក​ទុក្ខ​ដល់​គ្រួសារ​របស់ Ronaldo ជា​ពិសេស​ខាង Liverpool ​បាន​ច្រៀង​បទ “You Never Walk Alone” ផង​ដែរ។

Man Utd បច្ចុប្បន្ន​ត្រូវ​ការ​ពិន្ទុ​ជា​ចាំបាច់​​ដើម្បី​ប្រជែង​យក​តំណែង Top ៤​បាន​ទៅ​លេង​នៅ Champions League រដូវ​កាល​ក្រោយ ហើយ​ពេល​នេះ​ពួក​គេ​កំពុង​នៅ​លេខ​៦។ ប្រកួត​បន្ទាប់​ពួក​គេ​ត្រូវ​ប៉ះ Arsenal ​នៅ​ចុង​សប្ដាហ៍​នេះ​ដែល​ទើប​នឹង​ឈ្នះ Chelsea ៤-២។ ដោយ​មើល​ឃើញ​ក្រុម​ត្រូវ​ការ​ឈ្នះ​បែប​នេះ Ronaldo បាន​ត្រលប់​​មក​ហ្វឹកហាត់​វិញ​ជា​បន្ទាន់​មិន​សម្រាក​យូរ​ឡើយ៕

Most Popular

To Top