ខ្សែបម្រើប្រយុទ្ធ Raheem Sterling កំពុងក្លាយជាគោលដៅចង់បានពីក្លឹប Chelsea, Bayern Munich និង Real Madrid ក្នុងរដូវក្ដៅនេះ។
Sterling សញ្ជាតិអង់គ្លេស នៅសល់កុងត្រាតែមួយឆ្នាំទៀតប៉ុណ្ណោះ ជាមួយ Manchester City និងកំពុងត្រូវបានទាក់ទងផ្ទេរ ទៅលេងនៅក្រៅស្រុក។ យ៉ាណាមិញ Chelsea ដែលជាក្លឹបក្នុងស្រុក (អង់គ្លេស) ក៏ចង់បាន Sterling ផងដែរ ដើម្បីបំពេញបន្ថែមតំបន់ ប្រយុទ្ធឲ្យកាន់តែខ្លាំង។
ក្លឹបយក្សនៅអាល្លឺម៉ង់ Bayern និងម្ចាស់ជើងឯក Champions League ក្លឹប Real Madrid ក៏កំពុងតាមដានស្ថានភាពរបស់ Sterling ប្រសិនបើគេចង់ចាកចេញពី Man City នៅរដូវក្ដៅនេះ។ Sterling បានត្រឹមអង្គុយកៅអីបម្រុងប៉ុណ្ណោះ សម្រាប់ការប្រកួតទាំងពីរជើង វគ្គពាក់កណ្ដាលផ្ដាច់ព្រ័ត្រ UCL ទល់នឹង Madrid ។
កីឡាករវ័យ២៧ឆ្នាំ មិនចង់ក្លាយជាផ្នែកតូចមួយរបស់ City ឡើយ ដោយចង់រួមចំណែកធំ ដើម្បីរក្សាកៅអីបានលេង នៅជម្រើសជាតិអង់គ្លេសក្នុងព្រឹត្តិការណ៍ World Cup ។ City ត្រូវបានរំពឹងថា នឹងដោះស្រាយស្ថានភាពរបស់ Sterling ម្ដងទៀត នៅខែក្រោយ ពេលដែលគេត្រលប់ ពីជួយជម្រើសជាតិវិញ ។
ក្លឹបអ្នកមាននៅអង់គ្លេស Man City ទើបតែនាំចូលខ្សែប្រយុទ្ធចំណូលថ្មីបាន២រូបគឺ Julian Alvarez និង Erling Haalang ហើយប្រធានក្លឹបបានប្រកាសថា ក្លឹបរំពឹងនាំចូលកីឡាករ ២នាក់បន្ថែមទៀតក្នុងរដូវក្ដៅនេះ ។ ការមកដល់របស់កីឡាករថ្មី អាចនឹងប៉ះពាល់ដល់នាទី លេងរបស់ Sterling៕
