ភ្នំពេញ៖ ក្លិបកីឡាវាយកូនឃ្លីលើតុ អគ្គនាយកដ្ឋានអន្តោប្រវេសន៍ទទួលបានមេដាយប្រាក់លើវិញ្ញាសាក្រុមបុរសក២ក្នុងការប្រកួតកីឡាវាយកូនឃ្លីលើតុជ្រើស រើសជើងឯកថ្នាក់ជាតិ ប្រចាំឆ្នាំ២០២៣ និងដើម្បីអបអរសាទរខួបអនុស្សាវរីយ៍ ថ្ងៃជ័យជម្នះ ៧មករា ឆ្នាំ១៩៧៩-២០២៤ នៅសាលដំបូលសហព័ន្ធកីឡាវាយកូនឃ្លីលើតុកម្ពុជា ក្នុងពហុកីឡដ្ឋានជាតិអូឡាំពិក។
ក្លិបកីឡាវាយកូនឃ្លីលើតុ Li Xing Group ដណ្តើមបានមេដាយមាស ខណៈក្លិបកីឡាវាយកូនឃ្លីលើតុ អគ្គនាយកដ្ឋានអន្តោប្រវេសន៍ទទួលបានមេដាយប្រាក់ ក្លិបកីឡាវាយកូនឃ្លីលើតុ និម្មិតកំពង់ឆ្នាំង និងក្លិបកីឡាវាយកូនឃ្លីលើតុ NGO Table Tennis Academy ទទួលបានមេដាយសំរិទ្ធ លើវិញ្ញាសាក្រុមបុរសក២។
ការប្រកួតប្រព្រឹត្តិមានរយៈពេល ៥ ថ្ងៃ ចាប់ថ្ងៃទី១០ ដល់១៤ ខែមករា ឆ្នាំ២០២៤ រៀបចំដោយសហព័ន្ធកីឡាវាយកូនឃ្លីលើតុកម្ពុជា ក្រោមការប្រើប្រាស់ថវិកាឧបត្ថម្ភប្រចាំឆ្នាំរបស់ក្រសួងអប់រំ យុវជន និងកីឡា។ ការប្រកួតជើងឯកថ្នាក់ជាតិឆ្នាំនេះមាន១៨ ក្លិប និងសមាគម លើ ៧ វិញ្ញាសា ។
វិញ្ញាសាទំាង ៧ រួមមានវិញ្ញាសាក្រុមបុរសក១ វិញ្ញាសាគូបុរសក១ វិញ្ញាសាឯកត្តបុរសក១ វិញ្ញាសាឯកត្តនារី វិញ្ញាសាក្រុមយុវជនក២ វិញ្ញាសាគូយុវជនក២ និងវិញ្ញាសាឯកត្តបុរសក២ ដែលមានកីឡាករ-កីឡាការិនី ៨៥ នាក់៕ ដោយ៖លី ភីលីព
