កូរ៉េខាងត្បូង៖ សេវាបេតិកភណ្ឌកូរ៉េ បាននិយាយកាលពីថ្ងៃពុធថា ខ្លួននឹងស្វែងរកការទទួលស្គាល់កីឡាតេក្វាន់ដូជាបេតិកភណ្ឌវប្បធម៌អរូបីរបស់អង្គការយូណេស្កូ ដោយបង្ហាញពីចេតនារបស់ខ្លួនក្នុងការបន្តការតែងតាំងរួមគ្នាជាមួយជាប្រទេសកូរ៉េខាងជើង នេះយោងតាមការចេញផ្សាយពីគេហទំព័រ Korea Herald ។
ទីភ្នាក់ងាររដ្ឋាភិបាលដែលទទួលខុសត្រូវចំពោះបេតិកភណ្ឌវប្បធម៌បាននិយាយថា ខ្លួនមានគោលបំណងដាក់ពាក្យស្នើសុំសិល្បៈក្បាច់គុនកូរ៉េក្នុងខែមីនា បន្ទាប់ពីពាក្យស្នើសុំដាច់ដោយឡែករបស់ទីក្រុងព្យុងយ៉ាងទៅកាន់អង្គការយូណេស្កូកាលខែមីនា ឆ្នាំ២០២៤។ ការវាយតម្លៃ និងការសម្រេចចិត្តចុងក្រោយត្រូវបានគេរំពឹងទុកនៅឆ្នាំក្រោយ ហើយការផ្លាស់ប្តូរនេះកើតឡើងជាផ្នែកមួយនៃគំនិតផ្តួចផ្តើមឆ្នាំ២០២៦ របស់សេវាបេតិកភណ្ឌកូរ៉េ។
នេះមិនមែនជាលើកទីមួយទេដែលសិល្បៈក្បាច់គុននេះត្រូវបានពិភាក្សាសម្រាប់ការទទួលស្គាល់ឆ្លងដែន។ នៅឆ្នាំ២០១៨ មន្ត្រីមកពីតេក្វាន់ដូពិភពលោករបស់កូរ៉េខាងត្បូង និងសហព័ន្ធតេក្វាន់ដូអន្តរជាតិរបស់កូរ៉េខាងជើងបានរៀបចំកិច្ចប្រជុំមួយនៅទីក្រុងព្យុងយ៉ាង ដើម្បីពិភាក្សាអំពីកិច្ចសហប្រតិបត្តិការក្នុងការបន្តចុះបញ្ជីអង្គការយូណេស្កូ។ ក្រោយមកសេវាបេតិកភណ្ឌកូរ៉េបានចេញសេចក្តីប្រកាសព័ត៌មានមួយកាលខែសីហា ឆ្នាំ២០២៤ ដោយពន្យល់ថា មិនមានការពិភាក្សាកម្រិតរដ្ឋាភិបាលណាមួយបានកើតឡើងរវាងកូរ៉េទាំងពីរទាក់ទងនឹងការជំរុញរួមគ្នាសម្រាប់ការចុះបញ្ជីនោះទេ។
កូរ៉េទាំង ២ ធ្លាប់បានដាក់ពាក្យស្នើសុំដាច់ដោយឡែកពីគ្នាសម្រាប់កីឡាចំបាប់ប្រពៃណីកូរ៉េ ។ កូរ៉េខាងត្បូងបានដាក់ពាក្យស្នើសុំរបស់ខ្លួនកាលខែមីនា ឆ្នាំ២០១៦ បន្ទាប់ពីការដាក់ស្នើរបស់កូរ៉េខាងជើងកាលខែមីនា ឆ្នាំ២០១៥ ហើយអង្គការយូណេស្កូបានចុះបញ្ជីកីឡានេះរួមគ្នានៅឆ្នាំ២០១៨។
ផែនការបេតិកភណ្ឌយូណេស្កូផ្សេងទៀតដែលកំពុងដំណើរការរួមមានការដាក់ពាក្យសុំសម្រាប់បន្ទាយរាជធានី Hanyang ឬ Hanyangdoseong ជាបន្ទាយនៃសតវត្សរ៍ទី១៨ ត្រូវបានសាងសង់ឡើងដើម្បីការពារ Hanyang ដែលជារាជធានីនៃព្រះរាជាណាចក្រ Joseon (១៣៩២-១៩១០)។
ការផលិតក្រដាស hanji ប្រពៃណី ដែលរួមបញ្ចូលចំណេះដឹង ជំនាញ និងការអនុវត្តដែលពាក់ព័ន្ធនឹងការបង្កើតក្រដាស នឹងត្រូវបានវាយតម្លៃសម្រាប់ការដាក់បញ្ចូលក្នុងបញ្ជីតំណាងនៃបេតិកភណ្ឌវប្បធម៌អរូបីរបស់មនុស្សជាតិនៅខែធ្នូ ឆ្នាំ២០២៦ ក្នុងសម័យប្រជុំលើកទី២១ នៃគណៈកម្មាធិការអន្តររដ្ឋាភិបាលសម្រាប់ការការពារបេតិកភណ្ឌវប្បធម៌អរូបី។
សេវាបេតិកភណ្ឌកូរ៉េក៏មានគម្រោងផ្តោតលើការអភិរក្សតំបន់ជុំវិញតំបន់បេតិកភណ្ឌពិភពលោក គាំទ្រកិច្ចប្រជុំគណៈកម្មាធិការបេតិកភណ្ឌពិភពលោកលើកទី ៤៨ របស់អង្គការយូណេស្កូ ដែលគ្រោងធ្វើនៅខែកក្កដា ឆ្នាំ ២០២៦ និងពង្រីកវិសាលភាពសកលនៃបេតិកភណ្ឌវប្បធម៌កូរ៉េ។ ទីភ្នាក់ងារនេះមានគោលបំណងសម្រាប់កំណើនប្រចាំឆ្នាំជាមធ្យម ៧.៥ ភាគរយក្នុងឧស្សាហកម្ម ដោយកំណត់គោលដៅទំហំទីផ្សារសរុបចំនួន ១០០ ពាន់ពាន់លានវ៉ុន ពីឆ្នាំ ២០២៦ ដល់ឆ្នាំ ២០៣០៕
