ញូវយ៉ក ៖ យោងតាមការចេញផ្សាយពីគេហទំព័រ Japan Today បានប្រាប់ឲ្យដឹងថា កីឡាករបាល់ទាត់លំដាប់ពិភពលោក Lionel Messi កីឡាករ Cristiano Ronaldo និងកីឡាករ Lewis Hamilton ស្ថិតក្នុងចំណោមកីឡាករឆ្នើម ដែលកាលវិភាគរបស់ពួកគេមានមន្ទិលសង្ស័យជាច្រើន ដោយសារតែសង្គ្រាមរីករាលដាលនៅមជ្ឈិមបូព៌ា។
ការលុបចោល និងការបិទការធ្វើដំណើរកំពុង ប៉ះពាល់ដល់ព្រឹត្តិការណ៍រួចទៅហើយចាប់តាំងពីអាមេរិក និងអ៊ីស្រាអែល បានបើកការវាយប្រហារ លើអ៊ីរ៉ង់កាលពីថ្ងៃសៅរ៍។ អ្នករៀបចំការប្រកួត Formula 1 និងការប្រកួតបាល់ទាត់សំខាន់ៗ ប្រឈមមុខនឹងការសម្រេចចិត្ត ក្នុងរយៈពេលប៉ុន្មានសប្តាហ៍ថា តើពួកគេអាចបន្តតាមកាលវិភាគបានដែរឬទេ។
ប្រទេសនៅមជ្ឈិមបូព៌ា បានក្លាយជាប្រទេសដ៏សំខាន់សម្រាប់ទេសភាពកីឡាពិភពលោកក្នុងរយៈពេលមួយទសវត្សរ៍ចុងក្រោយនេះ ក្នុងនាមជាម្ចាស់ផ្ទះ ព្រឹត្តិការណ៍ អ្នកគាំទ្រហិរញ្ញវត្ថុ និងនិយោជកសម្រាប់អត្តពលិកកំពូលៗមួយចំនួន របស់ពិភពលោក។ ពេលវេលាកំពុងរំកិលសម្រាប់ការសម្រេចចិត្តថា តើត្រូវលុបចោល ឬផ្លាស់ប្តូរការប្រកួតបាល់ទាត់ Finalissima នៅថ្ងៃទី ២៧ ខែមីនា រវាងអេស្ប៉ាញ និងអាហ្សង់ទីន ជាជើងឯកនៃទ្វីបអឺរ៉ុប និងអាមេរិកខាងត្បូង។ ការប្រកួតនោះនឹងផ្តល់ឱកាសឲ្យ Messi ឈ្នះពានរង្វាន់មួយផ្សេងទៀតក្នុងអាជីពដ៏អស្ចារ្យ។
កាតាបានផ្អាកការប្រកួតបាល់ទាត់ទាំងអស់ រហូតដល់មានការជូនដំណឹងបន្ថែមនៅថ្ងៃអាទិត្យ។ អាហ្សង់ទីនក៏ត្រូវបានគ្រោង នឹងលេងជាមួយកាតាក្នុងការប្រកួតមិត្តភាពនៅថ្ងៃទី ៣១ ខែមីនាផងដែរ។
ស្ថាប័នបាល់ទាត់អឺរ៉ុប UEFA បានប្រាប់ The Associated Press កាលពីថ្ងៃចន្ទថា UEFA កំពុងតាមដាន និងវាយតម្លៃដោយប្រុងប្រយ័ត្ន នូវការវិវឌ្ឍន៍ទាំងអស់នៃស្ថានភាពនេះ ដោយសហការជាមួយ (ស្ថាប័នបាល់ទាត់អាមេរិកខាងត្បូង) CONMEBOL និងគណៈកម្មាធិការរៀបចំក្នុងស្រុក)។ ក្រុមបាល់ទាត់របស់ Ronaldo គឺក្លឹប Al-Nassr របស់អារ៉ាប៊ីសាអូឌីត បានរងផលប៉ះពាល់រួចហើយដោយរលក នៃការលុបចោលការប្រកួត Asian Champions League ។ ក្រុមរបស់គាត់ត្រូវបានគ្រោងនឹងលេងនៅថ្ងៃពុធនៅទីក្រុងឌូបៃ។
F1 មានការប្រណាំងនៅប្រទេសបារ៉ែន និងអារ៉ាប៊ីសាអូឌីតនៅខែក្រោយ។ F1 និងក្រុមរបស់ខ្លួនជាធម្មតាចាប់ផ្តើមហោះហើរជាមួយបុគ្គលិក និងទំនិញជាច្រើនសប្តាហ៍ជាមុន ដែលកំណត់ពេលវេលាដើម្បីធ្វើការសម្រេចចិត្តថាតើត្រូវបន្តឬអត់។ ស្ថាប័នគ្រប់គ្រង FIA និយាយថាអាទិភាពរបស់ខ្លួនគឺ សុវត្ថិភាព និងសុខុមាលភាព។
អ៊ីរ៉ង់គ្រោងនឹងបញ្ជូនក្រុមបាល់ទាត់បុរសរបស់ខ្លួនទៅកាន់ អាមេរិកសម្រាប់ព្រឹត្តិការណ៍ World Cup ក្នុងរយៈពេលជាង ៣ ខែទៀត ដោយការប្រកួតដំបូងនឹងធ្វើឡើងនៅថ្ងៃទី ១៦ ខែមិថុនាជាមួយនឹងនូវែលសេឡង់ក្នុងទីក្រុង Inglewood រដ្ឋ California៕
