បរទេស៖ អតីតខ្សែបម្រើប្រេស៊ីល លោក Felipe Melo បានរិះគន់តាមកញ្ចក់ទូរទស្សន៍ថា ក្រុមជម្រើសជាតិ ហាក់បានធ្លាក់ទម្រង់លេងជាង កាលពីព្រឹត្តិការណ៍ World Cup ឆ្នាំ២០២៦ ដែលកាលនោះពួកគេបានធ្លាក់ត្រឹមវគ្គ ១៦ក្រុមចុងក្រោយដោយថ្វីជើងន័រវែស (ដែលជាកំណត់ត្រាធ្លាក់លឿនបំផុតតាំងពីឆ្នាំ១៩៩០) នេះបើតាមការចេញផ្សាយពីសារព័ត៌មាន ESPN ថ្ងៃទី៦ ខែតុលា ឆ្នាំ២០២៦ ។
សម្រាប់ការប្រកួតមិត្តភាពថ្មីៗនេះ ប្រេស៊ីលបានលេងស្មើ ១-១ និងឈ្នះ ៤-២ លើក្រុមអូស្ត្រាលី មុនពេលបន្តយកឈ្នះលើឥណ្ឌា ៤-០ កាលពីថ្ងៃសៅរ៍។ ទោះបីជាទទួលបានជ័យជម្នះក្តី ប៉ុន្តែអ្នកគាំទ្រក្នុងស្រុកភាគច្រើននៅតែមិនពេញចិត្ត ហើយគ្រូបង្វឹកលោក Carlo Ancelotti កំពុងត្រូវបានគេចាត់ទុកថាជា “ការខកចិត្តយ៉ាងខ្លាំង” ។ ទោះយ៉ាងណា គ្រូបង្វឹកសញ្ជាតិអ៊ីតាលីរូបនេះ បានឆ្លើយតបយ៉ាងស្ងប់ស្ងាត់ថា លោកពេញចិត្តនឹងឱកាស ក្នុងការសាកល្បងកីឡាករថ្មីៗ។
បញ្ហាចម្បងរបស់លោក Ancelotti គឺការរៀបចំទម្រង់លេង។ ប្រេស៊ីលសម្បូរដោយខ្សែប្រយុទ្ធស្លាបឆ្នើមៗ ប៉ុន្តែនៅខ្សោយតំបន់បម្រើកណ្តាល ក្នុងការគ្រប់គ្រងបាល់ (មិនដូចអេស្ប៉ាញ)។ ការសាកល្បងប្រើទម្រង់ ៤-២-៤ ជាមួយនឹងខ្សែប្រយុទ្ធ៤នាក់ ក្នុងការប្រកួតដំបូងទល់នឹងអូស្ត្រាលី ត្រូវបានចាត់ទុកថាជាបរាជ័យ ដោយសារក្រុមប្រហោងធ្លាយ និងខ្វះភាពរលូន។
ការត្រលប់មកប្រើទម្រង់ ៤-៣-៣ វិញក្នុងការប្រកួតទី២ និងទី៣ ដោយបន្ថែមខ្សែបម្រើកណ្តាល (ដូចជា Gabriel Bontempo និង Andrey Santos) បានធ្វើឱ្យទម្រង់លេងរបស់ក្រុមមានភាពប្រសើរឡើង និងជួយឱ្យតំបន់ប្រយុទ្ធ (ដូចជា Vinícius Júnior ជាដើម) អាចស្វែងរកគ្រាប់បាល់បាន។
នៅខែក្រោយ ប្រេស៊ីលនឹងត្រូវប៉ះជាមួយជប៉ុន ក្នុងការប្រកួតមិត្តភាពនៅប្រទេសសិង្ហបុរី។ ដោយសារតែការខកចិត្តក្នុងព្រឹត្តិការណ៍ World Cup និងទម្រង់លេងដែលនៅតែរងការរិះគន់នាពេលថ្មីៗនេះ ការបង្ហាញទម្រង់លេងឱ្យបានល្អទល់នឹងក្រុមជប៉ុន ត្រូវបានគេមើលឃើញថាជារឿងដ៏សំខាន់បំផុត ដើម្បីធានាសុវត្ថិភាពការងាររបស់លោក Ancelotti ជាគ្រូបង្វឹកបន្តទៀត។
ប្រែសម្រួល៖ គីរី
