ចាប់ពីនីតិវិធីបង្ការ រហូតដល់ការព្យាបាល សិង្ហបុរី កសាងមូលដ្ឋានគ្រឹះជីវសាស្ត្រ និង ការបង្កើតប្រព័ន្ធអេកូឡូស៊ីចម្រុះដ៏រឹងមាំ ដើម្បីប្រយុទ្ធប្រឆាំងនឹងវីរុសកូវីដ ១៩។ វិស័យសាធារណៈ និងឯកជន បាន និងកំពុងតែបង្កើតដំណោះស្រាយ និងការច្នៃប្រឌិតក្នុងបច្ចេកវិទ្យា ចាប់តាំងពីការផ្ទុះការឆ្លងក្នុងប្រទេសសិង្ហបុរី មកម្ល៉េះ។
ក្រុមជំនាញផ្នែកគំនិតច្នៃប្រឌិតរបស់សិង្ហបុរី បានធ្វើការឆ្លើយតបយ៉ាងឆាប់រហ័ស ក្នុងពេលប្រឈមមុខនឹងកូវីដ ១៩ ពោលគឺចាប់ពីការផ្តល់បច្ចេកវិទ្យាចាប់រកវីរុស ដូចជា បច្ចេកវិទ្យាឆ្លាតវៃ ជាដើម ត្រឹមតែប៉ុន្មានសប្តាហ៍ រហូតដល់យុទ្ធនាការចាក់វ៉ាក់សាំងសាកល្បង ក្នុងរយៈពេលប៉ុន្មានខែក្រោយមក។
ការចាត់វិធានការយ៉ាងឆាប់រហ័សនេះ អាចធ្វើទៅបាន ដោយសារតែមូលដ្ឋានគ្រឹះដ៏រឹងមាំរបស់សិង្ហបុរី លើវិទ្យាសាស្ត្រសុខាភិបាល និងជីវសាស្ត្រ ក៏ដូចជាការផ្តោតឥតឈប់ឈរលើការច្នៃប្រឌិតបច្ចេកវិទ្យាថ្មីៗ។
ចាប់ពីការបង្ការការឆ្លងវីរុស រហូតដល់ការធ្វើតេស្ត និងការព្យាបាលដើម្បីសង្គ្រោះជីវិត ក្រុមហ៊ុនតូច-ធំ កំពុងតែចាប់ដៃគូសហការគ្នាជាមួយនឹងស្ថាប័នសាធារណៈ និងអ្នកជំនាញក្នុងស្រុក ដើម្បីធានាថា នឹងមានបច្ចេកវិទ្យា និងការច្នៃប្រឌិតថ្មីៗ ដើម្បីប្រយុទ្ធប្រឆាំងជាមួយនឹងវីរុស គ្រប់ដំណាក់កាលទាំងអស់។
ខាងក្រោមនេះ គឺជាបច្ចេកវិទ្យាថ្មីៗនានាដែលសិង្ហបុរី ប្រើប្រាស់ដើម្បីទប់ស្កាត់ការឆ្លងវីរុសកូវីដ ១៩៖
១. បច្ចេកវិទ្យាតាមដាន និងរកប្រភពចម្លង
ក្រៅពីការណែនាំឲ្យប្រជារបស់ខ្លួនពាក់ម៉ាសជានិច្ចនៅទីធារណៈ ឧបករណ៍បច្ចេកវិទ្យា iThermo ត្រូវបានបង្កើតឡើង និងប្រើប្រាស់ដើម្បីវាស់កម្តៅអ្នកដំណើរនៅតាមវិទ្យាស្ថានសុខភាព តាមការិយាល័យ និងផ្សារទំនើបទូទាំងសិង្ហបុរី ខណៈដែលឧបករណ៍នេះ អាចវាស់កម្តៅបានយ៉ាងឆាប់រហ័ស ពោលគឺលឿនជាងឧបករណ៍វាស់កម្តៅធម្មតាដល់ទៅ៥ដង។
ក្រោយមក ក្រោមកិច្ចសហប្រតិបត្តិការជាមួយនឹងក្រសួងសុខាភិបាល ភ្នាក់ងារបច្ចេកវិទ្យា GovTech បានដាក់ឲ្យដំណើរការកម្មវិធី TraceTogether ដើម្បីតាមរកប្រភពចម្លង ខណៈដែលកម្មវិធីនេះ ដាក់ឲ្យប្រើប្រាស់ដោយឥតគិតប្រាក់ទូទាំងពិភពលោក។
២. ការផលិតឧបករណ៍ ធ្វើតេស្តយ៉ាងមានប្រសិទ្ធិភាព
ដំណោះស្រាយលើ ឧបករណ៍ធ្វើតេស្តរបស់សិង្ហបុរី កំពុងតែឈានមុខគេ ទូទាំងពិភពលោក។ cPass គឺជាឧបករណ៍ធ្វើតេស្ត ដែលអាចវិភាគមេរោគបានដំបូង គេក្នុងពិភពលោក ដែលត្រូវបានប្រើប្រាស់ដើម្បីតេស្តរកវីរុស និងរោគសញ្ញានានា សូម្បីតែជាអ្នកជំងឺជាសះស្បើយហើយក៏ដោយ ហើយគេអាចដឹងលទ្ធផលជាមួយនឹងឧបករណ៍នេះ ក្នុងរយៈពេល១ម៉ោងប៉ុណ្ណោះ ។
ក្រោយមកទៀត cPass ត្រូវបានដាក់លក់ឲ្យប្រើប្រាស់ ទូទាំងពិភពលោក ក្រោយពីទទួលបានអាជ្ញាប័ណ្ណពីរដ្ឋាភិបាលផ្នែកចំណីអាហារ និងឱសថសហរដ្ឋអាមេរិក ។
៣. ការបង្កើតថ្នាំ ដើម្បីពង្រឹងភាពស៊ាំ និងព្យាបាល
ស្របពេលដែលពិភពលោក កំពុងរង់ចាំដំណោះស្រាយលើវ៉ាក់សាំង ការព្យាបាល នៅសិង្ហបុរី លើអ្នកឆ្លងវីរុសកូវីដ ១៩ មិនមែនជាសុបិន ដែលនៅឆ្ងាយឡើយ។ TY027 គឺជាថ្នាំព្យបាល ដ៏មានប្រសិទ្ធិភាពមួយ ដែលកំពុងតែប្រើប្រាស់លើខ្លួនមនុស្ស ។ ថ្នាំ TY027 ត្រូវបានអភិវឌ្ឍដោយក្រុមហ៊ុន Tychan ក្រោមកិច្ចសហប្រតិបត្តិការជាមួយ នឹងក្រសួងការពារជាតិ ក្រសួងសុខាភិបាល និងក្រុមប្រឹក្សាអភិវឌ្ឍសេដ្ឋកិច្ច។
បើទោះបីគេបានរកឃើញ វ៉ាក់សាំងក៏ដោយ ប៉ុន្តែ វ៉ាក់សាំង ប្រហែលជាមិនអាចជួយដល់អ្នកដែលមានប្រព័ន្ធភាពស៊ាំទន់ខ្សោយឡើយ ។ ប៉ុន្តែ ក្រោមកិច្ចសហប្រតិបត្តិការជាមួយនឹងក្រុមហ៊ុនអូស្ត្រាលី Vaxine និងមជ្ឈមណ្ឌលសុខាភិបាល Flinders ក្រុមហ៊ុន Proteona កំពុងផលិតថ្នាំដែលអាចជួយពង្រឹងប្រព័ន្ធភាពស៊ាំបាន ហើយបើជោគជ័យ វានឹងជួយដល់អ្នកជំងឺដែលខ្សោយប្រព័ន្ធភាពស៊ាំ ដើម្បីប្រឆាំនឹងវីរុសកូវីដ ១៩។
៤. បច្ចេកវិទ្យាកំណត់ រោគសញ្ញាពីចម្ងាយបាន
ក្រៅពីមានប្រសិទ្ធិភាពលើការព្យាបាល ដំណោះស្រាយបច្ចេកវិទ្យាឆ្លាតវៃលើសុខភាព កំពុងតែជួយឲ្យសិង្ហបុរី អាចរកឃើញពីរោគសញ្ញា និងវីរុសពីចម្ងាយបាន។ សិង្ហបុរី បានប្រើប្រាស់កម្មវិធី Take Doctor Anywhere ដើម្បីពិភាក្សាពីបញ្ហាសុខភាព តាមអនឡាញ ហើយក្នុងរយៈពេលតែ៥នាទី អ្នកប្រើប្រាស់អាចពិភាក្សាជាមួយនឹងគ្រូពេទ្យ និងទទួលបានការពិនិត្យភ្លាមៗ។
ក្នុងករណីមានការសង្ស័យឆ្លងកូវីដ ១៩ ក្រុមគ្រូពេទ្យ Doctor Anywhere Care Team នឹងផ្តល់ជំនួយតាមអនឡាញ និងដោយផ្ទាល់ភ្លាមៗ។ ជាមួយគ្នានេះ សិង្ហបុរី ក៏ប្រើប្រាស់ឧបករណ៍ Biovitals Sentinel ដើម្បីតាមដានប្រភពចម្លងវីរុសកូវីដ ១៩ ផងដែរ ខណៈដែលឧបករណ៍នេះគេប្រើដើម្បីរករោគសញ្ញានៅក្នុងខ្លួនអ្នកជំងឺ តាមរយៈការប្រើការវិភាគទិន្នន័យជាក់ស្តែងពីចម្ងាយ។
៥. ប្រើមនុស្សយន្តបាញ់ថ្នាំសម្លាប់មេរោគដោយស្វ័យប្រវត្តិ
ក្រៅពីការប្រើប្រាស់ប្រព័ន្ធ ឌីជីដលជាច្រើនដូចជា QR Code, URL ឬកម្មវិធីចល័តជាច្រើនទៀត ក្នុងសម័យកូវីដ ១៩ សិង្ហបុរី បានប្រើបច្ចេកវិទ្យាដែលមិនចាំបាច់ប៉ះពាល់ជាមួយមនុស្ស ខណៈដែលពួកគេបានប្រើប្រាស់មនុស្សយន្តដែលដំណើរការ ពាក់កណ្តាលស្វ័យប្រវត្តិ ដើម្បីបាញ់ថ្នាំសម្លាប់មេរោគលើផ្ទៃនានា តាមទីសាធារណៈ និងអគារនានា។ របកគំហើញនេះ ជួយកាត់បន្ថយហានិភ័យនៃការប៉ះពាល់របស់អ្នកប្រើប្រាស់លើផ្ទៃដែលមានមេរោគ ។
៦. សិង្ហបុរី បង្កើតគំនិតដ៏សម្បូរបែប ដើម្បីជីវិតកាន់តែល្អប្រសើរ
ការច្នៃប្រឌិត និងបច្ចេកវិទ្យារបស់សិង្ហបុរី មិនមានសម្រាប់ តែការប្រយុទ្ធប្រឆាំងនឹងកូវីដ ១៩ ឡើយ ខណៈដែលពួកគេក៏បាន អភិវឌ្ឍទៅលើដំណាំកសិកម្មក្នុងទីក្រុង ផ្សារទំនើបដែលប្រើប្រាស់តែការស្កែនតាមរយៈទូរស័ព្ទដើម្បីទូទាត់ រថយន្តក្រុង និងតាក់ស៊ីគ្មាន មនុស្សបើក នំឌីមសាំផ្សំពីបង្គារដែលចិញ្ចឹមក្នុងមន្ទីរពិសោធ និងបង្គោលភ្លើងឆ្លាតវៃជាដើម ៕
