ហ្សាកាតា៖មន្ត្រីបាននិយាយថា នាយកប្រតិបត្តិ OpenAI លោក Sam Altman បានទទួលទិដ្ឋាការមាសដំបូងរបស់ប្រទេសឥណ្ឌូនេស៊ី ខណៈសេដ្ឋកិច្ចដ៏ធំបំផុតរបស់អាស៊ីអាគ្នេយ៍មើលទៅ ទាក់ទាញអ្នកវិនិយោគបរទេសដែលមានទ្រព្យសម្បត្តិ យោងតាមការចេញផ្សាយពីគេហទំព័រជប៉ុនធូដេ ។
លោក Silmy Karim អគ្គនាយកអន្តោប្រវេសន៍បាននិយាយក្នុងសេចក្តីថ្លែងការណ៍មួយថា សហស្ថាបវនិកនៃ ChatGPT Bot Sensation ត្រូវបានផ្តល់ទិដ្ឋាការរយៈពេល ១០ ឆ្នាំសម្រាប់ការរួមចំណែកដ៏មានសក្តានុពលរបស់លោកចំពោះការអភិវឌ្ឍន៍បញ្ញាសិប្បនិម្មិតក្នុងប្រទេសឥណ្ឌូនេស៊ី។ លោកបានបន្តថា នៅពេលអ្នកកាន់ទិដ្ឋាការមាសបានមកដល់ប្រទេសឥណ្ឌូណេស៊ី ពួកគេលែងត្រូវការសុំលិខិតអនុញ្ញាត ស្នាក់នៅបណ្តោះអាសន្ននៅការិយាល័យអន្តោប្រវេសន៍ទៀតហើយ ។ យើងកំពុងដាក់កម្រាលព្រំក្រហមជា ថ្នូរនឹងធនធានដែលពួកគេផ្តល់ដល់ប្រទេសឥណ្ឌូនេស៊ី។
មន្ត្រីរូបនេះបាននិយាយថា សហគ្រិនបច្ចេកវិទ្យាដែលមានមូលដ្ឋាននៅសហរដ្ឋអាមេរិក ក៏ទទួលបានទិដ្ឋាការពិសេស ដោយសារតែកេរ្តិ៍ឈ្មោះអន្តរជាតិរបស់លោកក្នុងនាម ជាប្រធានក្រុមហ៊ុនស្រាវជ្រាវ និងអភិវឌ្ឍន៍បញ្ញាសិប្បនិម្មិត។
យោងតាមសេចក្តីថ្លែងការណ៍បានឲ្យដឹងថា ជាមួយនឹងទិដ្ឋាការមាស បុរសអាយុ ៣៨ ឆ្នាំនឹងអាចឆ្លងកាត់ជួរអន្តោប្រវេសន៍នៅអាកាសយានដ្ឋានរបស់ប្រទេសឥណ្ឌូនេស៊ី ហើយកាន់តែងាយស្រួលចូល និងចេញពីប្រទេស។ ប្រទេសឥណ្ឌូនេស៊ីបានដាក់ចេញនូវទិដ្ឋាការមាស សម្រាប់អ្នកវិនិយោគដែលនឹងទទួល បានការស្នាក់នៅរយៈពេលប្រាំឆ្នាំ ប្រសិនបើពួកគេបណ្តាក់ទុនចំនួន ២.៥ លានដុល្លារនៅក្នុងប្រទេស និង ១០ ឆ្នាំប្រសិនបើពួកគេចំណាយទ្វេដងនោះ។
ក្រុមមន្ត្រីបាននិយាយថា ប្រទេសនេះកំពុងសម្លឹងរក មើលការអភិវឌ្ឍប្រព័ន្ធអេកូឡូស៊ីបញ្ញាសិប្បនិម្មិត និងសហគមន៍ក្នុងប្រទេសនេះ ខណៈឧស្សាហកម្មកំពុងរីកចម្រើនទូទាំងពិភពលោក។ លោក Altman បានទៅលេងប្រទេសឥណ្ឌូនេស៊ីក្នុងខែមិថុនា ដើម្បីនិយាយអំពីបញ្ញាសិប្បនិម្មិត៕
ដោយ៖លី ភីលីព
