ញូវដែលី ៖ ក្រុមហ៊ុន Xiaomi របស់ប្រទេសចិន បានប្រាប់ New Delhi ជាផ្លូវការថា ក្រុមហ៊ុនផ្គត់ផ្គង់គ្រឿង បន្លាស់ស្មាតហ្វូន មានការប្រុងប្រយ័ត្ន ចំពោះការដំឡើងប្រតិបត្តិការ ក្នុងប្រទេសឥណ្ឌា ចំពេលមានការត្រួតពិនិត្យ យ៉ាងយកចិត្តទុកដាក់ ចំពោះក្រុមហ៊ុនចិន ដោយរដ្ឋាភិបាលរបស់ខ្លួន ។
Xiaomi Corp. ដែលមានចំណែកដ៏ធំបំផុត នៅលើទីផ្សារស្មាតហ្វូន របស់ប្រទេសឥណ្ឌាចំនួន ១៨ ភាគរយក៏បានសួរនៅលិខិតចុះថ្ងៃទី ៦ ខែកុម្ភៈថា ប្រទេសឥណ្ឌាពិចារណា ផ្តល់ការលើកទឹកចិត្ត ដល់ការផលិត និងកាត់បន្ថយពន្ធនាំចូល សម្រាប់គ្រឿងបន្លាស់ ស្មាតហ្វូនមួយចំនួន ។
ក្រុមហ៊ុនចិន ដំឡើង ស្មាតហ្វូននៅប្រទេស ឥណ្ឌា ដែលភាគច្រើនជាគ្រឿងផ្សំ ក្នុងស្រុក ហើយសល់ពីចិន និងកន្លែងផ្សេងទៀត ។ លិខិតនេះគឺ ជាការឆ្លើយតបរបស់ Xiaomi ទៅនឹងសំណួរ របស់ក្រសួងព័ត៌មានវិទ្យា របស់ប្រទេស ឥណ្ឌា ដោយសួរថា តើទីក្រុងញូវដែលី អាចអភិវឌ្ឍវិស័យផលិតគ្រឿង បន្លាស់របស់ប្រទេសនេះ ដោយរបៀបណា ។
ប្រទេសឥណ្ឌា បង្កើនការត្រួតពិនិត្យលើអាជីវកម្មចិន បន្ទាប់ពីការប៉ះទង្គិចព្រំដែន រវាងប្រទេសទាំង២ កាលឆ្នាំ ២០២០ បានសម្លាប់ទាហានឥណ្ឌា យ៉ាងហោចណាស់ ២០ នាក់ និង ៤ នាក់ មកពីប្រទេសចិន ដោយបានរំខាន ដល់ផែនការវិនិយោគ របស់ក្រុមហ៊ុនចិនធំៗ និងទាញការតវ៉ាម្តង ហើយម្តងទៀត ពីទីក្រុងប៉េកាំង ។
ក្រុមហ៊ុនចិនដែលកំពុងប្រតិបត្តិការ នៅប្រទេសឥណ្ឌា មានការរអាក់រអួល ក្នុងការនិយាយជាសាធារណៈអំពីការត្រួតពិនិត្យនេះ លិខិតរបស់ក្រុមហ៊ុន Xiaomi បង្ហាញថា ពួកគេនៅតែបន្តតស៊ូនៅ ប្រទេសឥណ្ឌា ជាពិសេសនៅចន្លោះស្មាតហ្វូន ដែលមានធាតុផ្សំសំខាន់ៗជាច្រើនមកពីអ្នកផ្គត់ផ្គង់ចិន។
លិខិតនោះ ប្រធានក្រុមហ៊ុន Xiaomi ឥណ្ឌា លោក Muralikrishnan B. បាននិយាយថា ប្រទេសឥណ្ឌាចាំបាច់ត្រូវ ធ្វើការលើវិធានការ កសាងទំនុកចិត្តដើម្បីលើកទឹកចិត្ត អ្នកផ្គត់ផ្គង់គ្រឿងបន្លាស់ឲ្យរៀបចំ ប្រតិបត្តិការក្នុងស្រុក ។
លោក Muralikrishnan បាននិយាយដោយ មិនបញ្ចេញឈ្មោះក្រុមហ៊ុនណាមួយថា មានការបារម្ភ ក្នុងចំណោមអ្នកផ្គត់ផ្គង់គ្រឿង បន្លាស់ទាក់ទង នឹងការបង្កើតប្រតិបត្តិការនៅប្រទេស ឥណ្ឌា ដែលផ្តើមចេញ ពីបញ្ហាប្រឈម របស់ក្រុមហ៊ុនក្នុងប្រទេសនេះ ជាពិសេសពីប្រភពដើម របស់ចិន ។
លិខិតនោះបាននិយាយថា ការព្រួយបារម្ភ គឺទាក់ទងនឹងការអនុលោមតាមច្បាប់ និងបញ្ហាទិដ្ឋាការ ដែលខ្លួនមិនបានបញ្ជាក់លម្អិត និងកត្តាផ្សេងទៀត។ វាបាននិយាយថា រដ្ឋាភិបាលគួរតែដោះស្រាយកង្វល់ទាំងនេះ ហើយធ្វើការដើម្បីបង្កើតទំនុកចិត្តក្នុងចំណោមអ្នកផ្គត់ផ្គង់គ្រឿងបន្លាស់បរទេស ដោយលើកទឹកចិត្តពួកគេឲ្យបង្កើត រោងចក្រផលិតនៅប្រទេសឥណ្ឌា ៕
ដោយ៖លី ភីលីព
