ចិន ៖ យោងតាមការចេញផ្សាយ ពីគេហទំព័រ Scmp បានប្រាប់ឲ្យដឹងថា ក្រុមហ៊ុនបច្ចេកវិទ្យាយក្សអាមេរិក Apple បានប្រកាសបើកមន្ទីរពិសោធន៍ ស្រាវជ្រាវរបស់ខ្លួនមួយទៀត ជាកន្លែងថ្មីស្ថិតនៅក្នុងតំបន់ សហប្រតិបត្តិការបច្ចេកវិទ្យា Hetao Shenzhen-Hong Kong គឺជាមជ្ឈមណ្ឌល ស្រាវជ្រាវមួយធំបំផុត ក្រៅទឹកដីអាមេរិក។
ក្រុមហ៊ុន Apple បានបើកមន្ទីរពិសោធន៍ស្រាវជ្រាវមួយ ក្នុងមជ្ឈមណ្ឌលបច្ចេកវិទ្យាចិនភាគខាងត្បូង នៃទីក្រុង Shenzhen ខណៈក្រុមហ៊ុនយក្ស របស់អាមេរិកបានពង្រឹង ការប្តេជ្ញាចិត្តរបស់ខ្លួន ចំពោះទីផ្សារស្មាតហ្វូនធំបំផុត របស់ពិភពលោក ចំពេលមានការប្រកួតប្រជែង កាន់តែខ្លាំងជាមួយ នឹងអ្នកលេងក្នុងស្រុក រួមទាំងបច្ចេកវិទ្យា Huawei ។
នេះបើយោងតាមរបាយការណ៍ របស់ប្រព័ន្ធផ្សព្វផ្សាយរដ្ឋ People’s Daily ថា រោងចក្រនេះ បានចាប់ផ្តើមប្រតិបត្តិការ កាលពីថ្ងៃព្រហស្បតិ៍នៅសួន Shenzhen ក្នុងទីក្រុង Hetao ជាតំបន់សហប្រតិបត្តិការ ត្រូវបានបង្កើតឡើងក្រោមការណែនាំ របស់រដ្ឋាភិបាលកណ្តាល ដើម្បីធ្វើឲ្យស៊ីជម្រៅភាពជាដៃគូ បច្ចេកវិទ្យារបស់ទីក្រុង ជាមួយប្រទេសជិតខាងហុងកុង ។
ក្រុមហ៊ុន Apple បានប្រកាសកាលពីខែមីនា នូវផែនការរបស់ខ្លួន ក្នុងការសាងសង់មន្ទីរពិសោធន៍ Shenzhen ថ្មីមួយ ដែលក្រុមហ៊ុនបាននិយាយថា នឹងបង្កើនសមត្ថភាពធ្វើតេស្ត និងស្រាវជ្រាវ សម្រាប់ផលិតផលសំខាន់ៗ របស់ខ្លួន រួមមាន iPhone, iPad និង Vision Pro កាសស្តាប់ត្រចៀកចម្រុះ ហើយថែមទាំងបម្រើ ដល់ការពង្រឹងកិច្ចសហការ របស់ក្រុមហ៊ុនជាមួយអ្នកផ្គត់ផ្គង់ក្នុងស្រុក។
រោងចក្រនេះមានទំហំ ២០,០០០ម៉ែត្រការ៉េក្នុងដំណាក់កាលដំបូង នឹងក្លាយជាមជ្ឈមណ្ឌលស្រាវជ្រាវ និងអភិវឌ្ឍន៍របស់ក្រុមហ៊ុន Apple ក្នុងតំបន់ Greater Bay Area ដែលជាមជ្ឈមណ្ឌលសេដ្ឋកិច្ច និងពាណិជ្ជកម្ម រួមមានទីក្រុងហុងកុង ម៉ាកាវ និងទីក្រុងចំនួន៩ក្នុងខេត្តក្វាងទុង៕
