យេរ៉ូសាឡឹម៖ ក្រុមហ៊ុនការពារជាតិអ៊ីស្រាអែល បានឲ្យដឹងនៅក្នុងសេចក្តីថ្លែងការណ៍មួយ កាលពីថ្ងៃចន្ទថា ក្រុមហ៊ុនអេឡិចត្រូនិកការពារជាតិអ៊ីស្រាអែល Elbit Systems នឹងផ្តល់ឱ្យកងម៉ារីនសហរដ្ឋអាមេរិក នូវប្រព័ន្ធមើលឃើញពេលយប់។
ការបញ្ជាទិញក្នុងតម្លៃ ៤៩លានដុល្លារអាមេរិក សេចក្តីថ្លែងការណ៍បានកត់សម្គាល់ថា ការបញ្ជាទិញប្រាក់ដុល្លារ នឹងត្រូវបានប្រតិបត្តិនៅក្នុងរដ្ឋ Virginia របស់សហរដ្ឋអាមេរិក តាមរយៈក្រុមហ៊ុនបុត្រសម្ព័ន្ធរបស់ Elbit ហើយនឹងត្រូវបានផ្គត់ផ្គង់ រហូតដល់ខែកញ្ញា ឆ្នាំ២០២៣ ។
ការបញ្ជាទិញនេះគឺជាផ្នែកមួយនៃកិច្ចសន្យារយៈពេល ៥ឆ្នាំដែលមានតម្លៃ ២៤៩លានដុល្លារ ចាប់ពីខែកញ្ញា ឆ្នាំ២០១៩ សម្រាប់ការផ្គត់ផ្គង់ប្រព័ន្ធកែវយឹត ពេលយប់ (SBNVG) របស់ក្រុម។
SBNVG គឺជាប្រព័ន្ធពាក់មួកសុវត្ថិភាពទម្ងន់ស្រាល ដែលមានបំពង់អាំងតង់ស៊ីតេរូបភាព ផូស្វ័រពណ៌ស នេះបើយោងតាមក្រុមហ៊ុន Elbit ។ ប្រព័ន្ធនេះពង្រឹងសមត្ថភាពចម្បាំង និងភាពរហ័សរហួន នៅក្នុងបរិយាកាស និងលក្ខខណ្ឌផ្សេងៗ៕ ប្រែសម្រួល ឈូក បូរ៉ា
