បរទេស៖ រដ្ឋមន្ត្រីការពារជាតិរុស្ស៊ី លោក Sergey Shoigu បានទទូចកាលពីថ្ងៃអង្គារថា ការថយចុះ នៃប្រតិបត្តិការយោធារបស់រុស្ស៊ី ក្នុងប្រទេសអ៊ុយក្រែន គឺជាចេតនាក្នុងគោលបំណង ដើម្បីជម្លៀសប្រជាជន និងជៀសវាងការស្លាប់បាត់បង់ជីវិត ក្នុងចំណោមជនស៊ីវិល។
យោងតាមសារព័ត៌មាន RT ចេញផ្សាយកាលពីថ្ងៃទី២៤ ខែឧសភា ឆ្នាំ២០២២ បានឱ្យដឹងថា លោក Sergey Shoigu បានពន្យល់ថា កងកម្លាំងប្រដាប់អាវុធរបស់រុស្ស៊ី កំពុងបង្កើតច្រករបៀងមនុស្សធម៌ និងប្រកាសបទឈប់បាញ់ ដើម្បីធានាការជម្លៀសប្រជាជន ដោយសុវត្ថិភាពពីការតាំងទីលំនៅ ដែលឡោមព័ទ្ធ ទោះបីជាវិធីសាស្រ្តនេះរារាំងវឌ្ឍនភាព នៃកងកម្លាំងរបស់ប្រទេសក៏ដោយ។
រដ្ឋមន្ត្រីការពារជាតិរុស្ស៊ីរូបនេះ បានពន្យល់នៅក្នុងកិច្ចប្រជុំ នៃក្រុមប្រឹក្សារដ្ឋមន្ត្រីការពារជាតិ នៃអង្គការសន្ធិសញ្ញាសន្តិសុខសមូហភាព (CSTO) ថា “ពិតណាស់ វិធីសាស្រ្តនេះ បានបន្ថយល្បឿន នៃការវាយលុក ប៉ុន្តែវាត្រូវបានធ្វើដោយចេតនា ដើម្បីជៀសវាងការស្លាប់ និងរបួសរបស់ជនស៊ីវិល”៕ ប្រែសម្រួលៈ ណៃ តុលា
