គៀវ៖ លោក Anatoly Lappo ប្រធានគណៈកម្មាធិការព្រំដែនរដ្ឋនៃប្រទេសបេឡារុស្សបានឲ្យដឹងថា កងកម្លាំងអ៊ុយក្រែន បានបំផ្លាញស្ពានស្ទើរតែស្រុង និងជីកយកផ្លូវនៅតាមព្រំដែនជាមួយប្រទេសបេឡារុស្ស។ ទីក្រុងមីនស៍ បានចោទប្រកាន់ទីក្រុងគៀវ ពីបទរៀបចំផែនការវាយប្រហារលើទឹកដីរបស់ខ្លួន។
លោក Lappo បានប្រាប់ទូរទស្សន៍បេឡារុស្ស យោងតាមទីភ្នាក់ងារព័ត៌មាន Interfax របស់រុស្ស៊ីថា “សព្វថ្ងៃនេះ ស្ពានព្រំដែនស្ទើរតែទាំងអស់ត្រូវបានបំផ្ទុះ ហើយផ្លូវព្រំដែនរថយន្ត និងផ្លូវដែកត្រូវបានជីកកកាយទាំងស្រុង”។
លោក Lappo បានលើកឡើងថា កងកម្លាំងអ៊ុយក្រែនបានពង្រឹងព្រំដែន ដល់កម្រិតដែលពួកគេបានដាក់មីនប្រឆាំងរថក្រោះជាបីជួរនៅតាមដងផ្លូវ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន RT។
លោក Lappo បានអះអាងថា កងទ័ពដែលក្រុងគៀវបានបញ្ជូនទៅព្រំដែនគឺ មិនមែនជាឆ្មាំព្រំដែន។ លោកបានបន្ថែមថា ឦយើងស្ថិតនៅក្រោមសម្ពាធ ពួកគេកំពុងតម្រង់ទៅឆ្មាំព្រំដែនរបស់យើង ជួនកាលពួកគេបាញ់លើអាកាស ការឈ្លបយកការណ៍តាមអាកាសជាប់ជានិច្ចកំពុងត្រូវបានអនុវត្ត”។
មួយថ្ងៃមុនព័ត៌មាននេះបានបែកធ្លាយ ក្រសួងការបរទេសអ៊ុយក្រែនបានអះអាងថា ឯកអគ្គរដ្ឋទូតរបស់ខ្លួនប្រចាំប្រទេសបេឡារុស្ស ត្រូវបានកោះហៅទៅកាន់ក្រសួងការបរទេសបេឡារុស្សហើយបានប្រគល់កំណត់ត្រាផ្លូវការមួយដោយថា “អ៊ុយក្រែនគ្រោងនឹងធ្វើកូដកម្មលើទឹកដីបេឡារុស្ស”។
ក្រសួងការបរទេសអ៊ុយក្រែនបានឲ្យដឹងថា ខ្លួន “ច្រានចោលទាំងស្រុង” ការចោទប្រកាន់នេះ ដោយបន្ថែមថា វាអាចជាផ្នែកនៃផែនការរបស់រុស្ស៊ី ដើម្បី “រៀបចំការបង្កហេតុ និងចោទប្រកាន់បន្ថែមទៀត” ប្រឆាំងនឹងក្រុងគៀវ។
កាលពីដើមសប្តាហ៍នេះ ប្រធានាធិបតីបេឡារុស្ស លោក Aleksandr Lukashenko បានចោទប្រកាន់អ៊ុយក្រែនថា បានប្រមូលផ្តុំទាហានរាប់ម៉ឺននាក់នៅជិតព្រំដែន ខណៈដែលលោក Lukashenko បានអនុញ្ញាតឱ្យទាហានរុស្ស៊ី ចូលអ៊ុយក្រែនពីទឹកដីរបស់ខ្លួននៅដើមប្រតិបត្តិការយោធារបស់រុស្ស៊ីនៅអ៊ុយក្រែន។
លោកបានឲ្យដឹងកាលពីសប្តាហ៍មុនថា តួនាទីរបស់បេឡារុស្ស ក្នុងជម្លោះត្រូវបានកំណត់ ចំពោះការការពារខ្លួន និងបដិសេធអ៊ុយក្រែន នូវសមត្ថភាពក្នុងការ “បាញ់ជនជាតិរុស្ស៊ីពីក្រោយខ្នង ពីទឹកដីនៃប្រទេសបេឡារុស្ស៕ប្រែសម្រួល ឈូក បូរ៉ា
