ភ្នំពេញ ៖ នាយប់ថ្ងៃទី១៦ ខែតុលា ឆ្នាំ២០២២អ្នកប្រដាល់ជើងខ្លាំង ឃុន បូរ៉ា បានយកឈ្នះអ្នកប្រដាល់ជើង ខ្លាំងសូត្រ វាសនាដោយពិន្ទុដណ្តើម បានកៅអីវគ្គបន្ត នៃព្រឹត្តិការណ៍ បើកការប្រកួតកីឡា ប្រដាល់គុនខ្មែរដណ្តើមខ្សែក្រវ៉ាត់ពានរង្វាន់សម្ដេចពិជ័យសេនា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ប្រភេទទម្ងន់ ៦០គីឡូកាម ឈានជើងចូលជុំទី៤ ហើយដំណើរឆ្ពោះទៅព្រឹត្តិការណ៍ ការប្រកួតកីឡា SEA GAMES 2023 លើកទី៣២ នៅសង្វៀនTV5 ។
អ្នកប្រដាល់ជើង ខ្លាំង ឃុន បូរ៉ា ក្លិបរស្មីភូមគាប ខេត្តបន្ទាយមានជ័យ បានផ្តួលអ្នកប្រដាល់ជើងខ្លាំង សូត្រ វាសនា ក្លិបបក្សីស្លាបដែក នៃសមាគមកីឡា ប្រដាល់ ក្រសួងការពារជាតិ ដោយពិន្ទុយ៉ាងស្រួលទំាំង៥ទឹក ដណ្តើមបានកៅអីវគ្គពាក់កណ្តាលផ្តាច់ព្រ័ត្រ ។ សម្រាប់ចុងទឹកទី២ ឃុន បូរ៉ា បានអុក មួយជង្គង់ ចំក្បាលពោះ របស់សូត្រ វាសនា ធ្វើឲ្យអាជ្ញាកណ្តាលរាប់៨ ប៉ុន្តែសូត្រ វាសនា នៅតែបន្តប្រកួតទៀត រហូតចប់ទឹកទី៥ អាជ្ញាកណ្តាលទំាង៥ រូបសម្រេចចិត្តឲ្យអ្នកប្រដាល់ជើងខ្លាំង ឃុន បូរ៉ាឈ្នះដោយពិន្ទុ ។
ចំណែកមួយគូរទៀត អ្នកប្រដាល់ ពុទ្ធ សំបូរ ក្លិបពុទ្ធសេរីវង្ស ក៏ឈ្នះអ្នកប្រដាល់ជើងរន្ទះ គង់ ហ៊ូវ ក្លិបគុហារព្រហ្មជ័យ ខេត្តសៀមរាបដោយពិន្ទុ ដូច្នេះអ្នកប្រដាល់ជើងរន្ទះ គង់ ហ៊ូវ ត្រូវធ្លាក់ដោយស្វ័យប្រវត្តិ ទោះបីនៅសល់មួយប្រកួតក៏ដោយ ។ អ្នកប្រដាល់ ពុទ្ធ សំបូរ អាចកមានសង្ឃឹមបន្តិត ទោះបីមួយប្រកួតប៉ះអ្នកប្រដាល់ជើងខ្លាំង ឃុន បូរ៉ាក៏ដោយ ។
ព្រឹត្តិការណ៍ប្រកួតកីឡាប្រដាល់គុនខ្មែរ ដណ្តើមខ្សែក្រវ៉ាត់ពានរង្វាន់ សម្តេចពិជ័យសេនា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នាពេលនេះ ពិតជាបានចូលរួម ចំណែកជាមួយនឹងការអភិវឌ្ឍ របស់រាជរដ្ឋាភិបាលកម្ពុជា ដូចជាចូលរួមចំណែក ផ្សព្វផ្សាយនូវសមិទ្ធិផល រីកចម្រើនលើគ្រប់វិស័យរបស់រាជរដ្ឋាភិបាលកម្ពុជា ក្រោមការដឹកនាំប្រកដោយគតិបណ្ឌិត របស់ សម្តេចតេជោ នាយករដ្ឋមន្ត្រី ព្រមទំាងរួមចំណែកលើកស្ទួយវិស័យសិល្បៈ វប្បធម៌ កីឡា នយោបាយ សេដ្ឋកិច្ច ទេសចរណ៍ និងវិស័យផ្សេងទៀតរបស់រាជរដ្ឋាភិបាលកម្ពុជា៕
