បរទេស៖យោងតាមការចេញផ្សាយរបស់ rt.com កាលពីថ្ងៃម្សិលមិញនេះបានឲ្យដឹងថា មេបញ្ជាការកំពូលនៃមន្ទីរប៉ង់តាហ្គោន បានធ្វើដំណើរទៅដល់មូលដ្ឋានទ័ព ដែលស្ថិតនៅក្នុងប្រទេសអាល្លឺម៉ង់ គឺជាទីតាំងដែលជាកន្លែងមើលការខុសត្រូវ កិច្ចការងារហ្វឹកហាត់យោធាអ៊ុយក្រែន។
មេបញ្ជាការកំពូលលោក Mark Milley បានធ្វើដំណើរមកដល់ Wiesbaden កាលពីថ្ងៃព្រហស្បតិ៍មកម្ល៉េះ ខណៈដែលអាមេរិកត្រូវបានគេមើលឃើញថា បានដើរតួយ៉ាងសំខាន់នៅក្នុងកិច្ចការងាររៀបចំ ធ្វើសមយុទ្ធយោធាធំមួយនៅអ៊ុយក្រែន។
ដំណើរទស្សនកិច្ចរបស់មន្ត្រីជាន់ខ្ពស់អាមេរិករូបនេះ ធ្វើឡើងទាំងដែលអាមេរិក នៅតែបន្តអះអាងថារដ្ឋាភិបាលទីក្រុងវ៉ាស៊ិនតោន នឹងមិនមានការចូលរួមពាក់ព័ន្ធដោយផ្ទាល់ ជាមួយនឹងរដ្ឋាភិបាលទីក្រុងគៀវ នៅក្នុងជម្លោះជាមួយនឹងប្រទេសរុស្សីឡើយ។
គួរឲ្យដឹងដែរថាសមយុទ្ធយោធា ដែលត្រូវបានធ្វើឡើងកាលពីសប្តាហ៍កន្លងទៅនោះ បានរៀបចំដំណើរការឡើងនៅក្នុងប្រទេសអ៊ុយក្រែន ហើយជឿជាក់ថានឹងអាចអូសបន្លាយ រយៈពេលជាច្រើនថ្ងៃបន្ថែមទៀត៕ ប្រែសម្រួល៖ស៊ុនលី
