ម៉ូស្គូ៖ ក្រសួងការបរទេសរុស្ស៊ី បានឲ្យដឹងថា ប្រទេសរុស្ស៊ី បានដាក់ទណ្ឌកម្មប្រឆាំងនឹងពលរដ្ឋអូស្ត្រាលី ចំនួន ៤៨នាក់ ដែលនឹងត្រូវហាមឃាត់មិនឱ្យចូលប្រទេសរបស់ខ្លួននោះឡើយ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ក្រសួងបានឲ្យដឹងថា ការសម្រេចចិត្តនេះត្រូវបានធ្វើឡើង ដើម្បីឆ្លើយតបទៅនឹងការដាក់ទណ្ឌកម្ម “ហេតុផលនយោបាយ” ដែលដាក់ដោយអាជ្ញាធរអូស្ត្រាលី ប្រឆាំងនឹងបុគ្គល និងអង្គភាពរបស់រុស្ស៊ី។
យោងតាមក្រសួងនេះ ជនជាតិអូស្ត្រាលីទាំង ៤៨ នាក់ ដែលក្នុងនោះមានអ្នកម៉ៅការយោធា អ្នកកាសែត និងសមាជិកក្រុមប្រឹក្សាក្រុង ជាអ្នកទទួលខុសត្រូវក្នុងការផ្សព្វផ្សាយរបៀបវារៈប្រឆាំងរុស្ស៊ី។
ប្រភពបានបន្ថែមថាទីក្រុងមូស្គូ នឹងបន្តធ្វើបច្ចុប្បន្នភាព បញ្ជីហាមឃាត់ការចូលរបស់ខ្លួន ដោយគិតគូរពីដំណើរប្រឆាំងរុស្ស៊ី របស់ទីក្រុងកង់បេរ៉ា។ អូស្ត្រាលី បានដាក់ទណ្ឌកម្មហិរញ្ញវត្ថុជុំថ្មី ប្រឆាំងនឹងអង្គភាពរុស្ស៊ី ចំនួន ២១ និងបុគ្គល ៣នាក់កាលពីថ្ងៃទ ១៩ ខែឧសភា ឆ្នាំ២០២៣៕ ប្រែសម្រួល ឈូក បូរ៉ា
