អ៊ុយក្រែន ៖ អ៊ុយក្រែនបានអំពាវនាវ ដល់ស្ថាប័នគ្រប់គ្រង UEFA ឲ្យបដិសេធ ការសម្រេចចិត្ត របស់ខ្លួនចំពោះ ក្រុមអាយុក្រោម ១៧ ឆ្នាំ របស់រុស្ស៊ីឡើងវិញ នៃការប្រកួត អន្តរជាតិ ហើយបាននិយាយថា ខ្លួននឹងធ្វើពហិការមិន ចូលរួមព្រឹត្តិការណ៍ណាមួយ ដែលក្រុមរុស្ស៊ីចូលរួម ខណៈសមាគមទាំង ប្រទេសប៉ូឡូញ និងអង់គ្លេសបានគាំទ្រ ជំហររបស់គៀវ យោងតាមការ ចេញផ្សាយពីគេហទំព័រ RT ។
កាលពីដើមសប្តាហ៍នេះ UEFA បានប្រកាសថា ខ្លួនគ្រោងនឹងដាក់ក្រុម អាយុក្រោម ១៧ ឆ្នាំរបស់រុស្ស៊ីឡើងវិញ ទៅកាន់ការប្រកួត នៅទ្វីបអឺរ៉ុប ក្នុងរដូវកាលនេះ ហើយកុមារមិនគួរត្រូវបាន ពិន័យសម្រាប់សកម្មភាព ដែលទទួលខុសត្រូវ ចំពោះមនុស្សពេញវ័យនោះឡើយ ។ ក្រុមបាល់ទាត់រុស្ស៊ីទាំងអស់ទាំងក្នុងក្លិប និងកម្រិតអន្តរជាតិត្រូវបាន UEFA ផ្អាកពីការប្រកួតចាប់តាំង ពីខែកុម្ភៈ ឆ្នាំ ២០២២ បន្ទាប់ពីការចាប់ផ្តើម នៃសកម្មភាពយោធា របស់ទីក្រុងម៉ូស្គូ ក្នុងប្រទេសអ៊ុយក្រែន ។
UEFA ក៏បានដកហូតសិទ្ធិ ធ្វើជាម្ចាស់ផ្ទះនៅ Saint Petersburg របស់ខ្លួនទៅកាន់វគ្គផ្តាច់ព្រ័ត្រនៃក្របខណ្ឌ Champions League ក្នុងឆ្នាំ ២០២២ ហើយក៏បានបញ្ចប់កិច្ចព្រមព្រៀងឧបត្ថម្ភ ជាមួយក្រុមហ៊ុនថាមពលរុស្ស៊ី Gazprom ផងដែរ។ សមាគមកីឡាបាល់ទាត់អ៊ុយក្រែន (UAF) បាននិយាយ បន្ទាប់ ពីការប្រកាសរបស់ UEFA ថា ខ្លួននឹងមិនចូលរួមការ ប្រកួតណាមួយដោយមាន ការចូលរួមពីក្រុមរុស្ស៊ីឡើយ ហើយបានអំពាវនាវ ឲ្យសមាគមសមាជិក UEFA ផ្សេងទៀតអនុវត្តតាម ។
UAF បានបន្ថែមថា ខ្លួនជឿថា ជំហររបស់ UEFA គឺគ្មានមូលដ្ឋាន និងបានអនុម័ត នៅកណ្តាល អរិភាពដែលធ្វើឡើង ដោយសហព័ន្ធរុស្ស៊ី។ ជំហររបស់ Kiev ត្រូវបានបន្ទរដោយ សមាគមបាល់ទាត់នៃប្រទេសប៉ូឡូញ និងអង់គ្លេស។ ប្រធានសមាគមកីឡាបាល់ទាត់ប៉ូឡូញ លោក Cezary Kulesza បានសរសេរនៅលើ X (អតីត Twitter) ថា ខ្ញុំមានការភ្ញាក់ផ្អើលចំពោះសេចក្តីថ្លែងការណ៍កាលពីម្សិលមិញពីគណៈកម្មាធិការប្រតិបត្តិ UEFA ។
Kulesza បានបញ្ជាក់បន្ថែមទៀតថា ប្រសិនបើក្រុមជម្រើសជាតិរុស្ស៊ីត្រូវបានអនុញ្ញាតឲ្យចូលរួម ក្នុងការប្រកួតនេះ ក្រុមជម្រើសជាតិរបស់យើងនឹងមិនប្រកួត ជាមួយពួកគេឡើយ ។ នេះគឺជាការសម្រេចចិត្តត្រឹមត្រូវ តែមួយគត់។ សមាគមកីឡាបាល់ទាត់ របស់អង់គ្លេសក៏បានសម្តែង ការប្រឆាំងរបស់ខ្លួនចំពោះ UEFA ដាក់ក្រុមដែលមិនទាន់គ្រប់ អាយុរបស់រុស្សីចូលប្រកួតវិញ ដោយប្រាប់ AFP ថា ក្រុមអង់គ្លេសនឹង មិនប្រកួតជាមួយរុស្ស៊ីទេ៕
ដោយ៖លី ភីលីព
