ភ្នំពេញ ៖ អ្នកប្រដាល់កម្ពុជា ២ រូប បានទទួលជ័យជម្នះ លើអ្នកប្រដាល់ថៃ ដោយពិន្ទុដូចគ្នា ខណៈ មួយរូបទៀត បានត្រឹមស្មើគ្នា ដោយពិន្ទុ ក្នុងព្រឹត្តិការណ៍ ការប្រកួតកីឡា ប្រដាល់គុនខ្មែរ មានរហ័សនាម “ការប្រកួតកីឡា ប្រដាល់អន្តរជាតិ គុនខ្មែរប៉ុស្តិ៍លេខ៥” លើសង្វៀន TV5 ព្រែកកំពឹស នាថ្ងៃទី ២ ខែមីនា ឆ្នាំ២០២៤ ការប្រកួតនេះរៀបចំ ដោយស្ថានីយប៉ុស្តិ៍លេខ៥ សហការជាមួយសហព័ន្ធ កីឡាប្រដាល់គុនខ្មែរ ។
អ្នកប្រដាល់ជើងខ្លាំងថៃ Sen Sakgneun ប្រកួតជាមួយអ្នកលេងជើងរន្ទះកម្ពុជា គង់ ហ៊ូវ របស់ក្លិបមហិទ្ធិរិទ្ធមេសថ្ងក បន្ទាប់ពីប្រកួតគ្នា ៥ ទឹកពេញនោះ អ្នកប្រដាល់កម្ពុជា គង់ ហ៊ូវ បានទទួលជ័យជម្នះដោយពិន្ទុ ។ ការប្រកួតកន្លងមក គង់ ហ៊ូវ តែងតែប្រើស្នៀត ទាត់ផ្កាប់ចានគូប្រកួត បានមុនទឹកទី៥ តែលើកនេះជួបជាមួយ Sen Sakgneun ជាជើងខ្លាំងដែរនោះ ទាំងសាខាងសុទ្ធតែវ៉ៃ ដោយប្រុងប្រយ័ត្ន ដូចគ្នាព្រោះពួកគេសុទ្ធតែអ្នកលេងស្នៀតផ្កាប់ចានដូចគ្នា។
អ្នកប្រដាល់ទាំង ២ រូបនេះតស៊ូជាមួយគ្នា ៥ ទឹកពេញដោយ គង់ ហ៊ូវ មានប្រៀបលើ គូប្រគួតបន្តិចបន្តួចប៉ុណ្ណោះ ។ កាលពីថ្ងៃទី២ ខែធ្នូ ឆ្នាំ២០២៣ អ្នកប្រដាល់ថៃ Katha Thep សន្លប់ដោយស្នៀតផ្កាប់ចាននៅទឹកទី២។
អ្នកប្រដាល់កម្ពុជា ខុន បូឡា របស់ក្លិបនាគនាំសំណាងដែលប្រកួតជាមួយអ្នកប្រដាល់ចំណូលថ្មីថៃ Chhuok Namseapក្នុងប្រភេទទម្ងន់ ៦៣,៥០ គីឡូក្រាមនោះក៏បានឈ្នះអ្នកប្រដាល់ថៃដោយពិន្ទុដែរ។ សម្រាប់គូនេះការប្រកួតក៏មានលក្ខណៈតឹងតែងគួរឲ្យកត់សម្គាល់ដែរ។
អ្នកប្រដាល់កម្ពុជា បូឡា មានកណ្ដាប់ដៃធ្ងន់ ជើងធ្ងន់ និងរហ័សនោះក៏មិនហ៊ានប្រហែសជាមួយកែង និងជង្គង់របស់អ្នកប្រដាល់ Chhuok Namseap ដែរ ។ អ្នកប្រដាល់ទំាង ២ រូបនេះប្រកួតគ្នាពេញទាំង៥ទឹក ហើយទាំងសងខាង សុទ្ធតែរងការ ឈឺសាច់ដូចគ្នា ។ ទោះជាយ៉ាងណាក៏ខុន បូឡាជាអ្នកបានទទួលជ័យជំនះ ដោយពិន្ទុដែរ ។
អ្នកប្រដាល់កម្ពុជា ហ៊ុនកង គុនខ្មែរ ក្លិបគុនខ្មែរដូនតា ប្រកួតបានត្រឹមស្មើពិន្ទុជាមួយអ្នកប្រដាល់ថៃ Phat Seayfa ដោយប្រកួតគ្នាក្នុងប្រភេទទម្ងន់៦៩គីឡូក្រាម ។ អ្នកប្រដាល់កម្ពុជា ហ៊ុនកង គុនខ្មែរមិនសូវជាមានផ្លែវ៉ៃល្អនោះទេ តែគេមានកម្លាំងយោងមិនតែប៉ុណ្ណោះការវ៉ៃចេញរបស់គេមានលក្ខណៈត្រង់ៗពេកដែលជាហេតុធ្វើឲ្យគូប្រកួតងាយនឹងការពារ ឬចល័តខ្លួនចេញពីការ វាយប្រហារ បានដោយស្រួល ។
ទោះជាយ៉ាងណាក៏ពួកគេ ប្រកួតគ្នា បានពេញទាំង៥ទឹក ។ ទោះបីទាំងសងខាងសុទ្ធ តែឈឺសាច់ដូចគ្នា ក៏ពិតមែនតែលទ្ធផលបានត្រឹមស្មើពិន្ទុគ្នា ៕
