កាំភ្លើងធំ Arsenal ទិញបានខ្សែការពារ Riccardo Calafiori ជាផ្លូវការហើយក្នុងតម្លៃខ្លួន ៤២លានផោនជាមួយសុពលភាពកុងត្រាមានរយៈពេល៥ឆ្នាំ។
ខ្សែការពារម្នាក់នេះអាចលេង បានទាំងការពារស្លាបឆ្វេង និងកណ្ដាល ខណៈដែលក្នុងព្រឹត្តិការណ៍ EURO 2024 គេក៏មានមុខលេង៣ប្រកួតក្នុងពូលផងដែរ។ ក្នុងពេលមកដល់កាំភ្លើងធំ Riccardo Calafiori បាននិយាយថា ខ្លួនបានរង់ចាំពេលវេលានៃការផ្ទេរមកកាន់ទឹកដីអង់គ្លេសយូរមកហើយ ការមកដល់ទឹកដីកាំភ្លើងធំគេពិតជាសប្បាយចិត្តខ្លាំងមែនទែន។ គេសង្ឃឹមថា ក្នុងរដូវកាលនេះ នឹងអាចជួយក្រុមបានច្រើន ព្រមទាំងអាចជួយឲ្យក្រុមលេង កាន់តែល្អជាងមុន ។
ក្រៅពីអាចលេងបាននៅចំណុចការពារកណ្ដាល និងការពារស្លាបឆ្វេង គេបានវិវឌ្ឍន៍ខ្លួនឡើងទៅលេងនៅតំបន់ស្លាបឆ្វេងបានយ៉ាងល្អថែមទៀតផង។ កាលពីរដូវកាលមុនគេបានចូលលេងជាមួយ Bologna បានចំនួន៣០ដងនិងរកបាន២គ្រាប់ក្នុងនាមជាខ្សែការពារស្លាប និងបញ្ជូនបាល់ឲ្យមិត្តរួមក្រុមរកគ្រាប់បាល់បានចំនួន ៥លើក និងបានជួយឲ្យក្រុម Bologna ឡើងទៅលេងពានរង្វាន់អឺរ៉ុប UEFA Champions League ។
Arteta អ្នកចាត់ការរបស់ Arsenal បាននិយាយទាក់ទងនឹងការចុះកុងត្រាយកខ្សែការពាររូបនេះថា Riccardo មានលក្ខណៈសម្បត្តិគ្រប់គ្រាន់ និងមានជំនាញពិសេសដែលអាចជួយក្រុមឲ្យកាន់តែមានភាពល្អប្រសើរ ហើយលោកជឿថា គេនឹងអាចជួយក្រុមឲ្យឈ្នះពានបានថែមទៀតផង៕
