បរទេស៖យោងតាមការចេញផ្សាយរបស់ RT សមាជិកអង្គការណាតូជាច្រើន រួមទាំងសហរដ្ឋអាមេរិក បានចេញការព្រមានអំពីការធ្វើដំណើរសម្រាប់ប្រទេសលីបង់ ដោយជំរុញឱ្យពលរដ្ឋរបស់ពួកគេចាកចេញពីប្រទេសជាបន្ទាន់ នៅពេលប្រឈមមុខនឹងសង្រ្គាមដ៏ខ្លាំងក្លារវាងអ៊ីស្រាអែល និងក្រុមប្រដាប់អាវុធគាំទ្រដល់ក្រុម Hezbollahដែលគាំទ្រប៉ាឡេស្ទីននោះ។
ភាពតានតឹងបានកើនឡើងយ៉ាងឆាប់រហ័សកាលពីថ្ងៃសៅរ៍ នៅពេលដែលការវាយប្រហារ ដោយគ្រាប់រ៉ុក្កែតបានសម្លាប់កុមារ ១២ នាក់នៅក្នុងទីក្រុង Druze នៃ Majdan Shams ក្នុងតំបន់ Golan Heights ដែលកាន់កាប់ដោយអ៊ីស្រាអែល។
កងកម្លាំងការពារអ៊ីស្រាអែលហៅកាត់ថាIDFបាននិយាយថា មីស៊ីលទាំងនេះគឺជាគ្រាប់រ៉ុក្កែត Falaq-1 ផលិតដោយអ៊ីរ៉ង់ ដែលបាញ់ដោយក្រុមហេសបូឡា ពីភាគខាងត្បូងប្រទេសលីបង់តែ យ៉ាងណាក៏ដោយ ពួកសកម្មប្រយុទ្ធបានបដិសេធថាមិនមានការពាក់ព័ន្ធក្នុងការធ្វើវាយប្រហារនោះទេ។
ភ្លាមៗស្ថានទូតអាមេរិក បានចេញផ្សាយការជូនដំណឹងអំពីការធ្វើដំណើរកាលពីថ្ងៃសៅរ៍ ដោយជំរុញឱ្យជនជាតិអាមេរិក ពិចារណាឡើងវិញយ៉ាងខ្លាំង អំពីការធ្វើដំណើរទៅកាន់ប្រទេសលីបង់។
ការិយាល័យការបរទេសរបស់ចក្រភពអង់គ្លេសបានណែនាំ ប្រឆាំងនឹងការធ្វើដំណើរទាំងអស់ទៅកាន់ប្រទេសលីបង់ ដោយសារហានិភ័យទាក់ទងនឹងជម្លោះ ដែលកំពុងបន្តរវាងអ៊ីស្រាអែល និងក្រុមហេសបូឡា។
ការព្រមានស្រដៀងគ្នានេះត្រូវបានចេញដោយប្រទេសបារាំង អាល្លឺម៉ង់ បែលហ្សិក ហូឡង់ ន័រវែស និងដាណឺម៉ាក ព្រមទាំងប្រទេសដែលមិនមែនជាអង្គការណាតូ ដូចជាអៀរឡង់ និងអូស្ត្រាលីផងដែរ៕
ប្រែសម្រួល៖ស៊ុនលី
