សិង្ហបុរី ៖ យោងតាមការចេញផ្សាយ ពីគេហទំព័រ Sky News បានប្រាប់ឲ្យដឹងថា រថយន្តសង្គ្រោះ រថយន្តពន្លត់អគ្គីភ័យ និងអង្គភាពកម្ចាត់ មេរោគដ៏ធំមួយត្រូវបានបញ្ជូន ទៅការិយាល័យរបស់ក្រុមហ៊ុនបច្ចេកវិទ្យាយក្សចិន ByteDance ដែលជាម្ចាស់កម្មវិធី TikTok នៅប្រទេសសិង្ហបុរី នៅពេលបុគ្គលិករាប់សិបនាក់បានធ្លាក់ខ្លួនឈឺ ដោយសារពុលអាហារ។
យ៉ាងហោចណាស់មនុស្ស ៦០ នាក់បានវិវត្តន៍រោគសញ្ញានៃជំងឺរលាកក្រពះពោះវៀន រួមមាន រមួលក្រពើ រាគ និងក្អួត ក្នុងនោះ ៥៧ នាក់កំពុងស្វែងរកការព្យាបាលនៅមន្ទីរពេទ្យ។ ក្រុមហ៊ុន ByteDance បានប្រាប់ Sky News ថាខ្លួនកំពុងស៊ើបអង្កេតឧប្បត្តិហេតុនេះ។
កាសែត The Straits Times បាននិយាយថា រថយន្តសង្គ្រោះចំនួន ១៧ គ្រឿង រថយន្តពន្លត់ អគ្គីភ័យ យានជំនិះដ៏ធំមួយ និងកងកម្លាំងការពារជន ស៊ីវិលសិង្ហបុរី ត្រូវបានបញ្ជូន ទៅការិយាល័យ ByteDance ។ ចំណែក Sky News យល់ថា ByteDance ប្រើប្រាស់អ្នកផ្គត់ផ្គង់ នៅខាងក្រៅ នៃអាហារដ្ឋានការិយាល័យរបស់ខ្លួន ហើយគ្មានអាហារត្រូវបានរៀបចំនៅនឹងកន្លែងនោះទេ។
អ្នកនាំពាក្យ ByteDance បានប្រាប់ Sky News ថា យើងកំពុងស៊ើបអង្កេតបញ្ហានេះ ហើយកំពុងធ្វើការជាមួយអាជ្ញាធរពាក់ព័ន្ធលើរឿងនេះ។ យើងយកចិត្តទុកដាក់ចំពោះសុខភាព និងសុវត្ថិភាពរបស់បុគ្គលិកយើងយ៉ាងខ្លាំង។ ពួកគេបានបន្ថែមថា ក្រុមហ៊ុនបានចាត់វិធានការភ្លាមៗ ដើម្បីគាំទ្របុគ្គលិកដែលរងផលប៉ះពាល់ទាំងអស់ រួមទាំងការធ្វើការជាមួយសេវាសង្គ្រោះបន្ទាន់ ដើម្បីផ្តល់ការថែទាំ។
សេចក្តីថ្លែងការណ៍រួមមួយបានផ្ញើទៅស្ថានីយទូរទស្សន៍ CNBC ជាផ្នែកនៃបណ្តាញដៃគូរបស់ Sky អាមេរិក NBC News ទីភ្នាក់ងារអាហារសិង្ហបុរី និងក្រសួងសុខាភិបាលបាននិយាយថា ពួកគេកំពុងស៊ើបអង្កេតករណីសង្ស័យថា មានជំងឺរលាកក្រពះ ។ គិតត្រឹមថ្ងៃទី ៣០ ខែកក្កដា ឆ្នាំ ២០២៤ មនុស្ស ៦០ នាក់ត្រូវបានគេរាយការណ៍ថា មានរោគសញ្ញានៃជំងឺរលាកក្រពះពោះវៀន ក្នុងនោះ ៥៧ នាក់បានកំពុងធ្វើការព្យាបាលនៅមន្ទីរពេទ្យ៕
