បិសាចក្រហម Manchester United បានចុះកុងត្រា យកបានខ្សែការពារ Matthijs de Ligt និង Noussair Mazraoui ហើយជាមួយតម្លៃ សរុបជិត៦០លានផោន។
សម្រាប់ De Ligt បានចុះកុងត្រាជាមួយបិសាចក្រហមមានរយៈពេល ៥ ឆ្នាំ ខណៈដែល Mazraoui បានចុះកុងត្រា៤ឆ្នាំ អ្នកទាំងពីរក៏មានកុងត្រាបន្ថែម ១ឆ្នាំទៀតផងដែរ ប្រសិនបើក្លឹប និងកីឡាករផ្ទាល់ពេញចិត្តបន្ត ។
United នឹងចំណាយ ៣៨,៥លានផោន ជាមួយលក្ខខណ្ឌបន្ថែម ៤.៣លានផោនសម្រាប់ការទិញយកខ្សែការពារកណ្ដាល De Ligt ។ ខ្សែការពារវ័យ២៥ឆ្នាំធ្លាប់កាន់កាប់តំណែងជាប្រធានក្រុម Ajax កាលគេស្ថិតក្រោមការដឹកនាំរបស់ Erik Ten Hag ឆ្នាំ២០១៩ ដោយកាលនោះគេរួមចំណែកយ៉ាងសំខាន់ជួយ Ajax ឡើងដល់វគ្គពាក់កណ្ដាលផ្ដាច់ព្រ័ត្រពានរង្វាន់ UEFA Champions League ។
ចំណែក Mazraoui ក៏ធ្លាប់ស្ថិតក្រោមការដឹកនាំរបស់ Ten Hag ដូចគ្នាកាលនៅ Ajax ហើយ De Ligt និង Mazraoui គឺជាចំណែកយ៉ាងធំដែលបានជួយឲ្យ Ajax ឡើងដល់វគ្គសំខាន់ និងធ្វើឲ្យ Ten Hag ត្រូវបានគេស្គាល់កាន់តែច្រើន។ ជាមួយការមកដក់របស់អ្នកទាំងពីរខ្សែការពារស្លាប Wan Bissaka ក៏ត្រូវបានគេដឹងថា បានផ្ទេរទៅកាន់ West Ham ហើយ ៕
