អូស្ត្រាលីចេញច្បាប់មួយ ការពារសិទ្ធិនិយោជិត ក្រៅម៉ោងធ្វើការ។ បុគ្គលិកនៅស្រុកអូស្ត្រាលីអាចមិនចាំបាច់ទទួលទូរស័ព្ទ ឬ អ៊ីម៉ែលពីកន្លែងការងារក្រៅពីម៉ោងធ្វើការ តាមរយៈសិទ្ធិការងារថ្មីមួយហៅថា «សិទ្ធិក្នុងការកាត់ផ្ដាច់ពីការងារ» ក្រោយពីម៉ោងធ្វើការបានបញ្ចប់។
ច្បាប់ថ្មីនេះបានចូលជាធរមាន នៅក្នុងថ្ងៃច័ន្ទនេះ ហើយបុគ្គលិកនានា មិនត្រូវបានទទួលបាន ការដាក់ទោសទណ្ឌណាមួយពីក្រុមហ៊ុន ឬ និយោជកណាឡើយ ក្នុងករណីដែលទទួលសារ ឬ ទូរស័ព្ទ ឬ ការងារណាមួយក្រៅពីម៉ោងធ្វើការរបស់ខ្លួន។
ច្បាប់នេះត្រូវបានបង្កើតឡើងក្រោយពីមានក្ដីព្រួយបារម្ភពីសំណាក់និយោជិត ឬ បុគ្គលិកនៅក្នុងប្រទេសអូស្ត្រាលី ពាក់ព័ន្ធនឹងរឿងបង្ខំឱ្យធ្វើការក្រៅម៉ោងការងារ។ ទំនោរនេះបានកើតឡើងយ៉ាងខ្លាំងចាប់តាំងពីសម័យកូវីដ-១៩មក ដោយបុគ្គលិកនានាតម្រូវឱ្យធ្វើការងារនៅផ្ទះ ហើយមិនមានតុល្យភាពច្បាស់លាស់រវាងជីវិតឯកជន និងជីវិតការងារ។
កាលពីឆ្នាំ២០២៣កន្លងទៅ បុគ្គលិកអូស្ត្រាលី ធ្វើការលើសម៉ោង ដោយមិនទទួលបានប្រាក់បន្ថែមចំនួនជាមធ្យម ២៨១ម៉ោង។ នេះបើតាមការស្រាវជ្រាវមួយរបស់វិទ្យាស្ថានអូស្ត្រាលី។ ក្នុងន័យនេះដែរបានសេចក្ដីថា ប្រជាជនអូស្ត្រាលីខាតបង់ទឹកប្រាក់សរុប ៨៨ប៊ីលានដុល្លារអាមេរិក ។
យ៉ាងណាមិញ ការបដិសេធមិនឆ្លើយអ៊ីម៉ែល ឬ មិនលើកទូរស័ព្ទក៏ត្រូវតែមានហេតុផលច្បាស់លាស់ផងដែរ។ ក្នុងករណីបន្ទាន់ខ្លាំង ក្រុមហ៊ុនអាចទាក់ទងបុគ្គលិករបស់ខ្លួនបាន។ ទោះជាយ៉ាងណាក្ដី ប្រសិនបើមានករណីវិវាទណាមួយកើតឡើង គណៈកម្មការយុត្តិធម៌ការងារអូស្ត្រាលី (FWC) ជាអ្នកកាត់ក្ដីលើរឿងវិវាទនេះ៕
