ហ្សឺណែវ៖ ទំហំពាណិជ្ជកម្មទំនិញសកលត្រូវបានគេរំពឹងថា នឹងកើនឡើង ២.៧ភាគរយនៅឆ្នាំ២០២៤ នេះបើយោងតាមការចេញផ្សាយពីគេហទំព័រឌៀលីម៉ែល។
ការព្យាករណ៍នេះ គឺខ្ពស់ជាងការព្យាករមុនរបស់ WTO បន្តិចដែលមានចំនួន ២,៦ ភាគរយដែលបានធ្វើឡើងក្នុងខែមេសា នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
យោងតាមរបាយការណ៍ ពាណិជ្ជកម្មទំនិញសកលបានជួបប្រទះនិន្នាការកើនឡើងនៅក្នុងឆមាសទីមួយនៃឆ្នាំ២០២៤ ដែលបង្ហាញពីការកើនឡើង ២,៣ភាគរយពីមួយឆ្នាំទៅមួយឆ្នាំ។ កំណើននេះត្រូវបានគេរំពឹងថា នឹងត្រូវបានបន្តដោយការពង្រីកកម្រិតមធ្យមបន្ថែមទៀតពេញមួយឆ្នាំដែលនៅសេសសល់ និងដល់ឆ្នាំ២០២៥។
របាយការណ៍បានឲ្យដឹងថា កំណើនផលិតផលក្នុងស្រុកសរុបពិតប្រាកដសកលនៅអត្រាប្តូរប្រាក់ទីផ្សារត្រូវបានព្យាករណ៍ថា នឹងនៅតែមានស្ថិរភាពនៅ ២,៧ ភាគរយក្នុងឆ្នាំ២០២៤ និង ២០២៥ ។
អង្គការពាណិជ្ជកម្មពិភពលោក បានកត់សម្គាល់ថានៅពាក់កណ្តាលឆ្នាំ២០២៤ អតិផរណាបានថយចុះគ្រប់គ្រាន់ ដែលអាចឱ្យធនាគារកណ្តាលកាត់បន្ថយអត្រាការប្រាក់។ ការធ្លាក់ចុះនៃអតិផរណានេះត្រូវបានគេរំពឹងថា នឹងបង្កើនប្រាក់ចំណូលគ្រួសារពិតប្រាកដ និងជំរុញការចំណាយរបស់អ្នកប្រើប្រាស់ ខណៈដែលអត្រាការប្រាក់ទាបគួរតែលើកទឹកចិត្តឱ្យក្រុមហ៊ុនជំរុញការចំណាយវិនិយោគរបស់ពួកគេ។
របាយការណ៍ក៏បានក្រើនរំលឹកផងដែរថា ភាពខុសគ្នានៃគោលនយោបាយរូបិយវត្ថុក្នុងចំណោមប្រទេសសេដ្ឋកិច្ចធំៗអាចបណ្តាលឱ្យមានការប្រែប្រួលផ្នែកហិរញ្ញវត្ថុ និងការផ្លាស់ប្តូរលំហូរមូលធន ដោយសារធនាគារកណ្តាលបន្ថយអត្រាការប្រាក់ ស្ថានភាពនេះអាចធ្វើឱ្យសេវាបំណុលកាន់តែលំបាក ជាពិសេសសម្រាប់បណ្ដាប្រទេសសេដ្ឋកិច្ចក្រីក្រ៕
ប្រែសម្រួល ឈូក បូរ៉ា
