ចិន៖យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា តារាសម្ដែងចិនលំដាប់ពិភពលោក នាង Fan Bingbing រក ចំណូលបានជាង ១.៤ ពាន់លានយន់ស្មើនឹង ១៩៥ លានដុល្លារអាមេរិក ក្នុងឆ្នាំ ២០២៤ តាមរយៈការ លក់របាំងមុខ និងក្រែមលាបមាត់ក្រោមម៉ាក Fan Beauty Diary របស់នាង។
យោងតាម Finance Sina បាននិយាយថា ស្ថិតនៅវ័យ ៤៤ ឆ្នាំ នាង Fan ត្រូវបានគេទទួលស្គាល់យ៉ាង ទូលំទូលាយថា ជាអ្នកជំនួញ និងជាអ្នកសរសេរប្លុកម៉ូដ ជាងតារាសម្ដែង ក្នុងប្រទេសចិន ។ របាយការណ៍ពីគេហទំព័រ អាជីវកម្មកែសម្ផស្ស មួយបានកត់សម្គាល់ថា នៅឆ្នាំ ២០២៤ Fan Beauty Diary ជាប់ចំណាត់ថ្នាក់ទី ៣៥ ក្នុងបញ្ជីម៉ាកផលិតផល សម្រស់ដ៏ពេញនិយមបំផុតរបស់ចិនទាំង ១០០ ។
ខណៈប្រាក់ចំណូលរបស់ Fan Beauty Diary គឺទាបជាងម៉ាក យីហោកំពូល Proya ដែលរកបាន ៨.៦ ពាន់លានយន់កាលពីឆ្នាំមុន អ្នកវិភាគចាត់ទុកនេះ ជាសមិទ្ធិផល ដ៏គួរអោយចាប់អារម្មណ៍ សម្រាប់ម៉ាកយីហោ ដែលបង្កើតឡើងកាលពី ៧ ឆ្នាំមុន។ Fan Beauty Diary កំពុងលេចចេញជាគូ ប្រជែងខ្លាំងក្នុងឧស្សាហកម្មសម្រស់។
យីហោនេះមានការរីក ចម្រើនជាលំដាប់ ជាមួយនឹងចំណុចសំខាន់ ដែលសម្រេចបាននៅខែមិថុនា នៅពេលវាបានលក់ ម៉ាសបិទមុខចំនួន ១០០,000 ប្រអប់ក្នុងរយៈពេលត្រឹមតែ ១០ វិនាទីក្នុងអំឡុងពេលផ្សាយផ្ទាល់ ។ ប្រអប់នីមួយៗមានតម្លៃ ១៩៨ យន់។ បន្ថែមពីលើរបាំងមុខ ម៉ាកយីហោនេះផ្តល់ជូននូវក្រែមលាបមាត់ សាប៊ូកក់សក់ ក្រែមថែរក្សាស្បែក ជាមួយនឹងតម្លៃចាប់ពី ៩៩ យន់ ដល់ ៦៨៤ យន់។
អ្នកគាំទ្រផ្សព្វផ្សាយផលិតផល របស់នាងតាមរយៈការផ្សាយពាណិជ្ជកម្ម ការផ្សាយបន្តផ្ទាល់ និងការសហការជាមួយអ្នក មានឥទ្ធិពលលើការផ្សាយបន្តផ្ទាល់របស់ចិនដ៏ពេញ និយមក្នុងអំឡុងពេលពិធីបុណ្យទិញទំនិញធំៗ។ គណនី Douyin របស់យីហោនេះមានអ្នកតាមដាន ១១.៤ លាននាក់។
ទន្ទឹមនឹងការបណ្តាក់ទុនជំនួញរបស់នាង Fan នៅតែបន្តចូលរួមក្នុង ព្រឹត្តិការណ៍អន្តរជាតិ បង្ហាញមុខក្នុងទស្សនាវដ្តី និងសម្តែងក្នុងខ្សែភាពយន្តដែលផលិតនៅហូលីវូដ កូរ៉េខាងត្បូង និងម៉ាឡេស៊ី៕
