ជប៉ុន៖ យោងតាមការចេញផ្សាយពីគេហទំព័រ koreaboo បានប្រាប់ឲ្យដឹងថា ព័ត៌មានលម្អិតបានលេចចេញឡើងជុំវិញអចលនទ្រព្យដ៏ធំសម្បើមដែលបានបន្សល់ទុកដោយតារាសម្តែងជប៉ុន Miho Nakayama ឲ្យកូនប្រុសរបស់តារាសម្តែងស្រីរូបនេះ បន្ទាប់ពីលោកស្រីបានទទួលមរណភាពភ្លាមៗ ។
យោងតាមរបាយការណ៍ថ្មីៗពីប្រព័ន្ធផ្សព្វផ្សាយជប៉ុនបាននិយាយថា កូនប្រុសរបស់តារាសម្តែងរូបនេះបានបដិសេធមិនទទួលមរតកអចលនទ្រព្យដែលមានតម្លៃប្រហែល ១៨,៩ ពាន់លានវ៉ុន (ប្រហែល ១២,៥ លានដុល្លារអាមេរិក)។ កូនប្រុសដែលកើតពីលោកស្រី Nakayama និងអតីតស្វាមីរបស់លោកស្រី ត្រូវបានគេដឹងថាបានផ្លាស់ទៅប្រទេសបារាំងបន្ទាប់ពីការលែងលះរបស់ឪពុកម្តាយរបស់គាត់។
សារព័ត៌មានក្នុងស្រុកសន្និដ្ឋានថា មូលហេតុនៃការលះបង់មរតកគឺរចនាសម្ព័ន្ធពន្ធមរតកខ្ពស់របស់ប្រទេសជប៉ុន។ នៅប្រទេសជប៉ុន អចលនទ្រព្យលើសពីកម្រិតជាក់លាក់មួយអាចត្រូវបានយកពន្ធក្នុងអត្រារហូតដល់ ៥៥ ភាគរយហើយពន្ធត្រូវតែបង់ជាសាច់ប្រាក់ក្នុងរយៈពេល ១០ ខែបន្ទាប់ពីដំណើរការទទួលមរតកចាប់ផ្តើម។
យោងតាមការស៊ើបអង្កេតរបស់ប៉ូលីស និងសេចក្តីថ្លែងការណ៍របស់ភ្នាក់ងាររបស់លោកស្រី ថា ពីមុនលោកស្រី Nakayama ត្រូវបានគេរកឃើញថា សន្លប់ក្នុងអាងងូតទឹកនៃផ្ទះរបស់នាងនៅ Shibuya ទីក្រុងតូក្យូ នៅថ្ងៃទី ៦ ខែធ្នូ ឆ្នាំ ២០២៤។ ការស្លាប់របស់នាងត្រូវបានកំណត់ថា ជាគ្រោះថ្នាក់ដែលបានកើតឡើងពេលកំពុងងូតទឹក៕
