ភ្នំពេញ ៖ គ្រូបង្វឹក គ្រូជំនួយក្រុមជម្រើសជាតិកម្ពុជាជាង ១០០នាក់បានចូលរួមរៀនវគ្គសិក្ខាសាលារយៈពេល០២ថ្ងៃ ដែលប្រព្រឹត្តទៅចាប់ពីថ្ងៃទី១ ដល់ថ្ងៃទី២ ខែមិថុនា ឆ្នាំ២០២៦ ស្ដីពី “ការរៀបចំទ្រឹស្ដី ផែនការហាត់ហ្វឹកហ្វឺន” ដើម្បីពង្រឹងសមត្ថភាពគ្រូបង្វឹក គ្រូជំនួយក្រុមកីឡាថ្នាល និងក្រុមកីឡាជម្រើសជាតិ ឆ្នាំ២០២៦ ក្រោមអធិបតីលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិកាជាតិអូឡាំពិកកម្ពុជា ។
ក្នុងឱកាសពិធីបើកជាផ្លូវការនេះ ដោយការលម្អដំណើរដោយ លោក ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា លោក ប៉ុន សុខ អគ្គនាយក នៃអគ្គនាយកដ្ឋានកីឡា លោក យានគី ស៊ីវត្ថា ប្រធានមជ្ឈមណ្ឌលជាតិហ្វឹកហ្វឺនកីឡា លោក ហួត សេងទ្រី ប្រធាននាយកដ្ឋានរៀបចំព្រឹត្តិការណ៍ និងស្ថិតិកីឡា និងប្រធាននាយកដ្ឋានអប់រំកាយ និងកីឡាសិស្ស និស្សិត នៅសាលហ្វឹកហាត់កីឡាបាល់បោះ ក្នុងមជ្ឈមណ្ឌលជាតិហ្វឹកហ្វឺនកីឡា ។
លោក យានគី ស៊ីវត្ថា ប្រធានមជ្ឈមណ្ឌលជាតិ ហ្វឹកហ្វឺនកីឡា បានប្រាប់ឲ្យដឹងថា មជ្ឈមណ្ឌលជាតិហ្វឹកហ្វឹនកីឡា បានទទួលការអនុញ្ញាត ជាគោលការណ៍ពីលោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ធ្វើការប្រលមូលផ្ដុំហាត់ហ្វឹកហ្វឺនក្រុមកីឡាជម្រើសជាតិ ជា ៣ដំណាក់កាល ដំណាក់កាលទី១ រយៈពេល០២ខែ ចាប់ពីថ្ងៃទី០១ខែ កុម្ភះ ដល់ថ្ងៃទី៣១ មីនា ឆ្នាំ២០២៦ ត្រៀមចូលរួមប្រកួតកីឡាអាស៊ីឆ្នេរ ខ្សាច់នៅសាធារណៈរដ្ឋប្រជាមានិតចិន កន្លងមកនេះ ទទួលបានមេដាយប្រាក់០១គ្រឿង នឹងសំរឹទ្ធិ០១គ្រឿង ដំណាក់កាលទី២ រយៈពេល ៧ខែ ចាប់ពីថ្ងៃទី០១ ខែមេសា ដល់ថ្ងៃទី៣១ ខែតុលា ឆ្នាំ២០២៦ ត្រៀមចូលរួម ប្រកួតកីឡាអាស៊ី លើកទី២០ នៅប្រទេសជប៉ុន និងក្រុមកីឡាថ្នាល រយេះពេល០៩ខែ ចាប់បីថ្ងៃទី០១ ខែមេសា ដល់ថ្ងៃទី៣១ ខេធ្នូឆ្នាំ២០២៦ ដំណាក់កាលទី៣ ចាប់ពីថ្ងៃទី០១ខែវិច្ឆិកា ឆ្នាំ២០២៦ ត្រៀមការប្រកួតអូឡាំពិក យុវជនរដូវក្ដៅ និងការប្រកួតអាស៊ីក្នុងសាល និងយុទ្ធគុនចម្រុះលើកទី៧ នៅអារ៉ាប់ប៊ីសាអូឌីត ។
លោកប្រធានមជ្ឈមណ្ឌលជាតិហ្វឹកហ្វឺន កីឡា បានបន្តថា វគ្គសិក្ខាសាលានេះ ទទួលបានការអនុញ្ញាត ជាគោលការណ៍ ពីលោកបណ្ឌិតសភាចារ្យ ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា ស្ដីពីការរៀបចំទ្រឹស្ដី ផែនការណ៍ហាត់ហ្វឹកហ្វឺន មានសក្ខាកាមជាគ្រូបង្វឹក ក្រុមកីឡាជម្រើសជាតិ ក្រុមកីឡាថ្នាល និងក្រុមកីឡាជនពិការចំនួន ៧៤នាក់ ក្នុងនោះគណៈកម្មការគ្រប់គ្រង វគ្គចំនួន ៥នាក់ គ្រូឧទ្ទេសចំនួន៥នាក់ អនុគណៈកម្មការសម្របសម្រួល ចំនួន៣នាក់ អនុគណៈកម្មាការជំនួយការចំនួន ៣នាក់ ។
ឆ្នាំ២០២៦ កម្ពុជាបានចូលរួមប្រកួតកីឡាអាស៊ីឆ្នេរខ្សាច់ទទួលបានមេដាយប្រាក់០១គ្រឿង និងសំរឹទ្ធិ០១គ្រឿង។
ឆ្នាំ២០២៦ ក្រសួងបានបញ្ជូនប្រភេទកីឡាទៅចូលរួមការប្រកួតអន្តរជាតិនានា ក្នុងនោះប្រភេទកីឡាFin-swimming ចូលរួមប្រកួតThe 2nd Bunga Raya Children & Junior Finswimming Competition 2026 នឹងប្រព្រឹត្តទៅនាថ្ងៃទី២៣ ខែឧសភា ឆ្នាំ២០២៦ នៅទីក្រុង Ipoh រដ្ឋ Perak ប្រទេសម៉ាឡេស៊ីទទួបានមេដាយចំនួន១៦គ្រឿង មាស១៥គ្រឿង សំរឹទ្ធិ០១គ្រឿង
លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា គោលបំណងនៃការរៀបចំវគ្គសិក្ខាសាលានេះឡើង គឺដើម្បីពង្រឹងបន្ថែមពីលើចំណេះដឹង និងចែករម្លែកបទពិសោធន៍ក្នុងការរៀបចំកម្មវិធីហ្វឹកហាត់ ប្រចាំថ្ងៃ ប្រចាំសប្ដាហ៍ និងផែនការណ៍ហាត់ហ្វឹកហ្វឺន ក្នុងនាមជាគ្រូបង្វឹកមិនមែនត្រឹមតែជាអ្នករៀបចំផែនការបង្ហាត់នោះទេ គឺត្រូវយល់ដឹងច្បាស់លាស់លើជំនាញរបស់ខ្លួន វិធីសាស្ត្របង្ហាត់ ត្រូរបបអាហារូបត្ថមកីឡា ផ្នែកចិត្តសាស្ត្រកីឡា ផ្នែកសង្គ្រោះបឋម ផ្នែកទំនាក់ទំនង និងការប្រើប្រាស់ថ្នាំផ្សេងៗ ដែលអាចធ្វើឲ្យមានការប៉ះពាល់ដល់ការហ្វឹកហាត់ និងការប្រកួតជាដើម។
លោកគ្រូ អ្នកគ្រូគឺជាអាណាព្យាបាលទីពីរបស់ កីឡាករ-កីឡាការិនី ត្រូវយកចិត្តទុកដាក់ ផ្ដល់ភាពកក់ក្ដៅ ភ្ជាប់ទំនាក់ទំនងល្អជាមួយគាត់ ទាំងលើទីលាន និងក្រៅទីលាន ទាំងវិន័យ សីលធម៍ក្នុងការដឹកនាំបង្ហាត់ ។ ជាពិសេសគឺការត្រៀមលក្ខណៈចូលរួមប្រកួទកីឡាអាស៊ីនៅប្រទេសជប៉ុន កីឡាស៊ីហ្គេមឆ្នាំ២០២៧ និងម្ចាស់យុវជនអាស៊ីលើកទី៥ ឆ្នាំ២០៣១ ដើម្បីបង្កើនគុណផលបច្ចេសកីឡា ក្នុងការចូលរួមប្រកួតដណ្ដើមមេដាយជូនជាតិ៕
