យោងតាមការចេញផ្សាយពីគេហទំព័រ Japan Today បានប្រាប់ឲ្យដឹងថា លោក Zhang Yiming ស្ថាបនិកក្រុមហ៊ុន ByteDance ដែលជាម្ចាស់ ក្រុមហ៊ុន TikTok បានក្លាយជាមហាសេដ្ឋីលំដាប់ទី ២ របស់អាស៊ី ដែលមានទ្រព្យសម្បត្តិ សុទ្ធចំនួន ៩២.៨ ពាន់លានដុល្លារអាមេរិក។
ទ្រព្យសម្បត្តិរបស់លោក Zhang បានកើនឡើងជាង ២៤ ពាន់លានដុល្លារនៅថ្ងៃពុធ បន្ទាប់ពី Bloomberg បានវាយតម្លៃការវាយតម្លៃ ByteDance ពីវិនិយោគិនដូចជា BlackRock, Fidelity Investments និងT. Rowe Price Group។ ការកើនឡើងនេះឆ្លុះបញ្ចាំងពីប្រជាប្រិយភាពរបស់ TikTok និង ByteDance AI chatbot Doubao បានទាក់ទាញអ្នកប្រើប្រាស់ប្រចាំខែជាង ៣០០ លាននាក់ និងក្លាយជា chatbot ដ៏ពេញនិយមបំផុតរបស់ប្រទេសចិន។
ក្រុមហ៊ុន ByteDance ក៏បានផ្ទេរផ្នែកខ្លះនៃប្រតិបត្តិការ របស់ខ្លួននៅសហរដ្ឋអាមេរិក ទៅឲ្យវិនិយោគិន អាមេកកាលពីដើមឆ្នាំនេះ ប៉ុន្តែទម្រង់របស់ខ្លួននៅតែដដែលបន្ទាប់ពីនោះ។
ទន្ទឹមនឹងនេះដែរ លោក Ambani ប្រធានក្រុមហ៊ុន Reliance Industries បានធ្លាក់ចុះមកចំណាត់ថ្នាក់ទី៣ នៅចំណាត់ថ្នាក់ទ្រព្យសម្បត្តិរបស់អាស៊ី ជាមួយនឹងទ្រព្យសម្បត្តិសុទ្ធចំនួន ៨៦.៩ ពាន់លានដុល្លារ។
យោងតាម Financial Express បាននិយាយថា ទ្រព្យសម្បត្តិរបស់លោកបានធ្លាក់ចុះចំនួន ២០.៨ ពាន់លានដុល្លាររហូតមកដល់ពេលនេះនៅឆ្នាំនេះ ដោយសារតែតម្លៃប្រេងសកលមានភាពប្រែប្រួល និងភាពចលាចលខាងភូមិសាស្ត្រនយោបាយ។ ក្រុមហ៊ុននេះ បង្កើតឡើងដោយឪពុករបស់លោកគឺលោក Dhirubhai Ambani ទសវត្សរ៍ឆ្នាំ១៩៥០ មានភាគហ៊ុនក្នុងវិស័យថាមពល លក់រាយ និងការកម្សាន្ត ដោយឧស្សាហកម្មគីមីឥន្ធនៈមានចំនួនជាងពាក់កណ្តាលនៃអាជីវកម្មរបស់ខ្លួន។
លោក Gautam Adani ប្រធានក្រុមហ៊ុន Adani Group ជាក្រុមហ៊ុនឥណ្ឌាមួយផ្សេងទៀត នៅតែជាអ្នកមានបំផុតនៅអាស៊ី ជាមួយនឹងទ្រព្យសម្បត្តិចំនួន ១១៧.៤ ពាន់លានដុល្លារ។
ស្ថតិនៅចំណាត់ថ្នាក់ទី៤គឺលោក Tadashi Yanai ស្ថាបនិកក្រុមហ៊ុនមេ Fast Retailing របស់ Uniqlo មានទ្រព្យសម្បត្តិចំនួន ៧២.៥ ពាន់លានដុល្លារ។ លោក Masayoshi Son ស្ថាបនិកក្រុមហ៊ុនវិនិយោគយក្ស SoftBank បានឈរនៅលំដាប់កំពូលទាំង៥ ជាមួយនឹងទ្រព្យសម្បត្តិចំនួន ៧២ ពាន់លានដុល្លារ៕
