បេងហ្គាឡូរូ៖ ប្រទេសឥណ្ឌាបានចេញមុខការពារដំណើរការអនុម័តសេវាអ៊ីនធឺណិតតាមផ្កាយរណបរបស់ខ្លួនថា មានភាពយុត្តិធម៌ និងគ្មានការរើសអើងកាលពីថ្ងៃព្រហស្បតិ៍ ប៉ុន្មានម៉ោងបន្ទាប់ពីមហាសេដ្ឋី Elon Musk បានចោទប្រកាន់ «ក្រុមមហាសេដ្ឋីផ្តាច់មុខ (Oligarchs)» ដែលមិនបញ្ចេញឈ្មោះ ពីរឿងរារាំងដំណើរការដាក់ឱ្យប្រើប្រាស់បណ្តាញ Starlink នៅក្នុងប្រទេសអាស៊ីខាងត្បូងមួយនេះ ។
លោក Musk បានបង្ហោះសារនៅលើបណ្តាញសង្គម X ដោយមិនបានបញ្ចេញឈ្មោះបុគ្គលណាម្នាក់ថា Starlink កំពុងត្រូវបានរារាំងដោយ «មហាសេដ្ឋីផ្តាច់មុខមួយចំនួន ដើម្បីបន្តក្តោបក្តាប់ទីផ្សារផ្តាច់មុខលើប្រជាជនឥណ្ឌា» នេះបើយោងតាមការចេញផ្សាយពីសារព័ត៌មាន Reuters ថ្ងៃទី៨ ខែតុលា ឆ្នាំ២០២៦។
ទីផ្សារទូរគមនាគមន៍របស់ប្រទេសឥណ្ឌាបច្ចុប្បន្នត្រូវបានគ្រប់គ្រងដោយក្រុមហ៊ុន Reliance Jio របស់មហាសេដ្ឋី Mukesh Ambani និងក្រុមហ៊ុន Bharti Airtel របស់មហាសេដ្ឋី Sunil Mittal។ គម្រោងអ៊ីនធឺណិតផ្កាយរណបរបស់ក្រុមហ៊ុនទាំងពីរ រួមជាមួយក្រុមហ៊ុន Starlink របស់លោក Musk ទទួលបានការយល់ព្រមបឋមដើម្បីដំណើរការនៅក្នុងប្រទេសឥណ្ឌារួចហើយ ប៉ុន្តែនៅតែបន្តរង់ចាំការបែងចែករលកសញ្ញា (Spectrum assignment) និងការអនុញ្ញាតចុងក្រោយពីអាជ្ញាធរ។ ក្រុមហ៊ុន Airtel និង Jio មិនបានឆ្លើយតបភ្លាមៗចំពោះការស្នើសុំការបំភ្លឺនោះទេ។
សម្រាប់ Starlink ការរង់ចាំនេះបានអូសបន្លាយពេលរហូតដល់ ៤ ឆ្នាំមកហើយ ដោយសារតែការត្រួតពិនិត្យយ៉ាងតឹងរ៉ឹងលើលក្ខខណ្ឌតម្រូវផ្នែកសន្តិសុខ និងការទទួលបានរលកសញ្ញា។
ឆ្លើយតបទៅនឹងការលើកឡើងរបស់លោក Musk ក្រសួងទូរគមនាគមន៍ឥណ្ឌាបានបញ្ជាក់ថា ស្ថាប័នទាំងបីស្ថិតក្នុងដំណាក់កាលត្រួតពិនិត្យបទប្បញ្ញត្តិស្មើៗគ្នា ហើយការវាយតម្លៃផ្នែកសន្តិសុខកំពុងបន្តអនុវត្តចំពោះភាគីនីមួយៗ ដោយក្រសួងមិនបានបញ្ជាក់ឈ្មោះក្រុមហ៊ុន ឬឈ្មោះលោក Musk ឡើយ។ ក្រសួងបានលើកឡើងក្នុងសេចក្តីថ្លែងការណ៍ថា៖ «ការចោទប្រកាន់ថា ក្របខ័ណ្ឌការងារ ឬការអនុវត្តមានភាពអយុត្តិធម៌ ឬរើសអើង គឺជារឿងគ្មានមូលដ្ឋាន និងជាការយល់ច្រឡំទាំងស្រុង»។
ភាពចម្រូងចម្រាសនេះមិនមែនជារឿងថ្មីនោះទេ។ កាលពីមុន លោក Musk ធ្លាប់មានការខ្វែងគំនិតជាមួយលោក Mittal និងលោក Ambani ជុំវិញរបៀបដែលឥណ្ឌាគួរផ្តល់រលកសញ្ញា មុនពេលភាគីទាំងបីបានសម្របសម្រួល និងចុះកិច្ចព្រមព្រៀងដាច់ដោយឡែកពីគ្នាកាលពីឆ្នាំ ២០២៥ ដើម្បីចែកចាយឧបករណ៍ Starlink នៅក្នុងប្រទេសឥណ្ឌា។ ទីផ្សារឥណ្ឌាផ្ដល់ឱកាសឱ្យ Starlink ដែលជាបុត្រសម្ព័ន្ធរបស់ SpaceX ចូលទៅកាន់ទីផ្សារអ៊ីនធឺណិតផ្កាយរណប ដែលក្រុមហ៊ុន Deloitte ព្យាករថានឹងមានតម្លៃរហូតដល់ ១,៩ ពាន់លានដុល្លារត្រឹមឆ្នាំ ២០៣០។
ពេលវេលានៃជម្លោះនេះក៏បានបង្កប់នូវទិដ្ឋភាពការទូតផងដែរ ខណៈសហរដ្ឋអាមេរិកបានជំរុញឱ្យឥណ្ឌាបើកទីផ្សារសម្រាប់ Starlink ជាផ្នែកមួយនៃសុច្ឆន្ទៈក្នុងកិច្ចចរចាពាណិជ្ជកម្ម ប៉ុន្តែទីក្រុងញូវដែលី និងវ៉ាស៊ីនតោននៅតែបន្តជួបការលំបាកក្នុងការឈានទៅបញ្ចប់កិច្ចព្រមព្រៀងពាណិជ្ជកម្ម ចាប់តាំងពីបានព្រមព្រៀងលើក្របខ័ណ្ឌការងារកាលពីខែកុម្ភៈ។
ក្តីបារម្ភផ្នែកសន្តិសុខក៏បានកើតឡើងផងដែរ បន្ទាប់ពីមានការរកឃើញឧបករណ៍ Starlink នៅក្នុងប្រទេសឥណ្ឌា។ អាជ្ញាធរឥណ្ឌាបានបញ្ជាក់ថា ពួកគេបានរកឃើញឧបករណ៍ Starlink ក្នុងប្រតិបត្តិការដាច់ដោយឡែកចំនួនពីរ កាលពីចុងឆ្នាំ ២០២៤ រួមមាន ការបង្ក្រាបគ្រឿងញៀនដោយប៉ូលិសនៅកោះ Andaman and Nicobar និងប្រតិបត្តិការរុករករបស់កងទ័ពនៅក្នុងរដ្ឋ Manipur។
ជុំវិញករណីនេះ លោក Musk បានអះអាងថារលកសញ្ញាផ្កាយរណប Starlink ត្រូវបាន «បិទដំណើរការលើដែនដីឥណ្ឌា» និង «មិនដែលបានបើកដំណើរការទាល់តែសោះតាំងពីដំបូង» ដែលជាការលើកឡើងដែលលោកបានបញ្ជាក់ឡើងវិញកាលពីថ្ងៃពុធ៕
ប្រែសម្រួល៖ គីរី
