បរទេស៖ ក្នុងស្ថានភាព ដែលកូរ៉ូណាកំពុងវាយប្រហារ ទៅលើប្រទេសដល់ទៅ១៦៧ប្រទេស ទៅហើយនោះ មហាសេដ្ឋីពាន់លាន លោក Bill Gates ចុងក្រោយនេះ បាននិយាយលើកទឹកចិត្តមនុស្សគ្រប់គ្នា គួរតែរក្សាចិត្តឲ្យត្រជាក់ និងបន្តរក្សាខ្លួន រហូតដល់ស្ថានភាព ល្អប្រសើរឡើងវិញ។
លោកបាននិយាយបែបនេះ នៅក្នុងកម្មវិធីមួយ ដែលមានឈ្មោះថា Ask Me Anything លើបណ្តាញសង្គមReddit។ ក្នុងនោះផងដែរ ក៏បានឆ្លើយទៅនឹងសំណួរជាច្រើន អំពីប្រធានបទធំបំផុត គឺមេរោគCOVID-19។
មានសំណួរ ដ៏គួរឲ្យចាប់អារម្មណ៍បំផុតមួយ បានសួរលោក ថាតើជំងឺរាតត្បាតនេះ នឹងអាចបន្តអូសបន្លាយដូចនេះបែបទៀត រហូតដល់ពេលណា។ លោកBill Gates បានតបយ៉ាងដូចនេះថា ប្រសើរបើប្រទេសទាំងឡាយ អាចដំណើរការបានល្អ ពាក់ព័ន្ធដំណើរការតេស្តរកមេរោគ ហើយសម្រេចចិត្ត បិទទ្វារប្រទេសមួយរយៈនោះ លោកជឿជាក់ថា ប្រទេសនោះនឹងអាចត្រឡប់ មកសភាពដើមវិញ ត្រឹមតែរយៈ៦ទៅ១០សប្តាហ៍ប៉ុណ្ណោះ ហើយករណីកើតឡើងនៃវិរុស ក៏នឹងកើតឡើងតិចតួចបំផុត នៅបន្ទាប់ពីនោះផងដែរ៕
ប្រែសម្រួល៖ស៊ុនលី
