សៀមរាប: រដ្ឋបាលខេត្តសៀមរាប សហភាពសហព័ន្ធយុវជនកម្ពុជាខេត្តសៀមរាប កាកបាទក្រហមកម្ពុជាខេត្តសៀមរាប និងសហគ្រិនវ័យក្មេងកម្ពុជាខេត្តសៀមរាប បានសហការគ្នារៀបចំកម្មវិធី ដំណើរកម្សាន្តនៅលើភ្នំគូលែន ដោយមានកញ្ចប់ទេសចរណ៍ចំនួន២ សម្រាប់ជ្រើសរើសនាថ្ងៃឈប់សម្រាកខាងមុខនេះ។
នេះបើតាមការបញ្ជាក់អោយដឹងពីសហភាពសហព័ន្ធយុវជនកម្ពុជាខេត្តសៀមរាប នាថ្ងៃទី១២ ខែសីហា ឆ្នាំ២០២០នេះ។
សហភាពសហព័ន្ធយុវជនកម្ពុជាខេត្តសៀមរាប បានបញ្ជាក់ថា ដំណើរកំសាន្តរុករកទីក្រុងបុរាណនាដើមសម័យអង្គរគឺ មហិន្ទ្របុរៈ (ភ្នំគូលែន) ដែលជាទីតាំងទេសចរណ៍វប្បធម៌ ប្រវត្តិសាស្ត្រ ធម្មជាតិ និងជាទីបូជនីយដ្ឋានដ៏សក្តិសិទ្ធិ និងល្បីល្បាញនៅកម្ពុជា។
សហភាពសហព័ន្ធយុវជនកម្ពុជាខេត្តសៀមរាប បានបន្តថា កម្មវិធី “សម្រាកសៀមរាប” បានរៀបចំដំណើរកំសាន្តនៅលើភ្នំគូលែន ដោយមានកញ្ចប់ទេសចរណ៍ចំនួន២ គឺការដើរព្រៃ និងបោះតង់ និងការដើរព្រៃ ជិះកង់ និងបោះតង់។ ចំពោះតម្លៃនៃកញ្ចប់ទេសចរណ៍ទី១ គឺការដើរព្រៃ និងបោះតង់ មានតម្លៃ៥៩ដុល្លាអាមេរិកក្នុងម្នាក់ , ចំពោះតម្លៃនៃកញ្ចប់ទេសចរណ៍ទី២ គឺការដើរព្រៃ ជិះកង់ និងបោះតង់ មានតម្លៃ៨៩ដុល្លាអាមេរិកក្នុងម្នាក់។
សហភាពសហព័ន្ធយុវជនកម្ពុជាខេត្តសៀមរាប បានបន្តទៀតថា ក្រុមទី១ : ចេញដំណើរ ថ្ងៃទី ១៨- ១៩ ខែសីហា ឆ្នាំ២០២០
ថ្ងៃទី១: វេលាម៉ោង០១:៣០រសៀលចេញដំណើរពីសាលាខេត្តសៀមរាបទៅកាន់ភ្នំគូលែនដោយរថយន្ត។ ចាប់ផ្តើមដើរពីវត្តព្រះអង្គជុបដល់ ទឹកជ្រោះបន្ទាប់មកដើរទៅកន្លែងបោះជំរុំ។
ថ្ងៃទី២: ដើរទៅទស្សនាព្រះអង្គធំ ទឹកធ្លាក់ ពើងជ្រួញ ពើងត្បាល់ ស្រះដំរី និង ត្រឡប់មកក្រុងវិញ។
ក្រុមទី២ : ថ្ងៃទី ២១- ២២ ខែសីហា ឆ្នាំ២០២០
ថ្ងៃទី១: វេលាម៉ោង០១:៣០រសៀល ចេញដំណើរពីសាលាខេត្តសៀមរាបទៅកាន់ភ្នំគូលែនដោយរថយន្ត។ចាប់ផ្តើមដើរពីវត្តព្រះអង្គជុបដល់ ទឹកជ្រោះបន្ទាប់មកដើរទៅកន្លែងបោះជំរុំ។
ថ្ងៃទី២ : ជិះកង់ទស្សនា ព្រះអង្គធំ-ទឹកធ្លាក់-ពើងជ្រួញ ពើងត្បាល់ ស្រះដំរី និង ត្រឡប់មកក្រុងវិញ៕ប្រភព៖propertyarea.asia
