បរទេស៖ទីភ្នាក់ងារសារព័ត៌មានផ្លូវការរុស្ស៊ី ឈ្មោះ RIA បានដកស្រង់សម្តីក្រសួងការពារជាតិបេឡារុសនៅថ្ងៃអង្គារនេះថា កងកម្លាំងយោធាបេឡារុស រុស្ស៊ីនិងស៊ែប៊ី នឹងចូលរួមក្នុងសហសមយុទ្ធយោធា នៅក្នុងប្រទេសបេឡារុស។
យោងតាមសេចក្តីរាយការណ៍មួយ ចេញផ្សាយដោយទីភ្នាក់ងារសារព័ត៌មាន នៅថ្ងៃទី០៨ ខែកញ្ញា ឆ្នាំ២០២០ បានឲ្យដឹងថា កាសែតខាងលើនេះបាននិយាយថា កងកម្លាំងរុស្ស៊ីនិងស៊ែប៊ី នឹងធ្វើដំណើរទៅដល់ប្រទេសបេឡារុស ចាប់ពីថ្ងៃទី១០ដល់ថ្ងៃទី១៥ ខែកញ្ញា តែមិនបានផ្តល់សេចក្តីលម្អិតបន្ថែមនោះទេ។
គួរបញ្ជាក់ថា ប្រទេសបេឡារុស នាពេលបច្ចុប្បន្ននេះ កំពុងតែរងរង្គោះរង្គើដោយការតវ៉ាដ៏ធំជារៀងរាល់ថ្ងៃ ចាប់តាំងពីប្រធានាធិបតីបេឡារុស លោក Alexander Lukashenko បានអះអាងពីជ័យជំនះរបស់លោក នៅក្នុងដំណើរការបោះឆ្នោតជាតិ កាលពីខែមុននេះ៕
